Monday, November 12, 2007

الجناح يهتز بشدة مع كل مطب من مطبات الهواء ..
أحيانا يهيأ إلى أنه سينخلع من جسم الطائرة فى طقس رمادى وضباب كثيف أوروبى غنى عن الوصف .. وحينما يهتز .. أجدنى أمسك بشدة فى ذراع مقعدى وكأنه سينقذنى عند الطوارئ ..

كان ذلك فى شهر أكتوبر .. وهى أول مرة أركب طائرة فى حياتى .. بل أول مرة أغادر فيها حدود مصر وقد كانت كل أمنيتى فى الحياة السفر الى لبنان .. وبالباخرة لأنها كانت أرخص شئ .. فقط لأحلف عالمصحف بعدها أننى سافرت إلى الخارج وشفت بلاد برة ..
وهكذا كانت أول رحلة لى .. وإلى أين ؟ .. سويسرا .. يعنى أول ما شطح ..

وسويسرا بالذات كانت لها دلالة خاصة منذ صغرى .. فقد كان زوج خالتى يرددها على مسامعى كلما تحدث عن أسرته العريقة لأن أخته سافرت هناك مرة ولم يذكر لماذا .. فهكذا كان السفر للخارج وقتها .. تجد أحدهم يقول لك " ده ركب الطيارة " .. مايعادل مكوك الفضاء فى زماننا الحالى ..

خرجنا من مطار زيوريخ ذى الطوابق المتعددة التى تبدأ بالسيارات الخاصة والسياحة فى أعلاها وتنتهى باتوبيسات النقل ومترو الانفاق ببطن الأرض .. ورأينا الطبيعة الجميلة التى كنا نراها فقط فى الصور والكروت ..
الآن نحن داخل الكارت نفسه .. جزء منه .. كل شئ جميل .. كل ما تراه عيوننا .. وتسمع آذاننا .. ويملأ أنوفنا هو أكثر من رائع .. مع صدمة التحول من الجبن الاسلامبولى الى الباستا بالموزاريللا والبارميزان والسيمون فيميه .. قلت لسعيد
مين اللى قال ان مصر أم الدنيا ؟ -
واحد من الفلاحين نزل محطة مصر أول مرة -
بعد فترة صحح معلوماتى كاتب فى جريدة بأن مصر أم الدنيا من حيث هى أول حضارة عرفها الانسان على الأرض ..
" كده سليم " ..

زيوريخ تتحدث الألمانية .. وهكذا كنا خرس لمدة 24 ساعة نتحدث بالاشارات وفى احسن الأحوال بالانجليزية اذا وجدنا من يتحدثها .. فى الجنوب يتحدثون الايطالية .. فى الشرق يتحدثون لغة قديمة هى الرومانج .. أما جنيف ولوزان والغرب جهة فرنسا فهم يتحدثون الفرنسية .. مع بعض التحوير الذى رأيته جميلا وبالذات فى لغة الارقام .. فهم يقولون تسعون بينما الفرنسيون الأصليون يقولون على التسعين أربع عشرينات وعشرة

فى لوزان حيث البعثة فى التكنولوجيا الحديثة للحام والتزويد .. كنت أنا وتيمور فقط نتحدث الفرنسية .. وهكذا كنا المحظوظين الوحيدين بالمجموعة .. أو ربما كنا التعيسين الوحيدين .. لا ادرى .. فقد تحولنا بعد فترة إلى مترجمين بصفة مستمرة لكل شاردة وواردة ..
" بيقول ايه ؟ ..ودى ايه ؟

فى القطار من برن العاصمة الى لوزان فى رحلة طولها ست ساعات .. أنا ورفعت .. هو من أعز أصدقائى ومن أكثرالناس اهتماما بأناقته .. الجاكيت والكرافات المختارين بعناية فائقة .. والحذاء البراق دائما .. ناهيك عن أنواع البارفانات التى تستطيع أن تعرف منها أيام الأسبوع .. ,حينما اقتربت لأجلس بجانبه قال
لا .. كل واحد يقعد فى كنبة لوحده .. الرحلة طويلة ياصاحبى .. -
قصدك آآ ؟ -
بالضبط .. واحدة زى القمر تركب القطر تلاقى مكان جانبى .. قدامى -
على راحتك يا سيدى .. هاقعد عالكنبة اللى قدامك .. يمكن تحتاجنى -

مرّ وقت طويل حتى صعدت سيدتان .. أصغرهما تناهز الستين من العمر .. والأخرى تتوكأ على عصا .. الأولى جلست بجانب رفعت .. والأخرى جانبى .. ولما وقعت عيناى عليه .. أسرعت الى ديوان الحقائب لانفجر ضاحكا .. ولما عدت سألنى
شوف لنا الجماعة دول هايوصلونا لوزان ولا ايه الحكاية -
للأسف -
ايه ؟ -
معانا لحد هناك -
ده ايه الحظ ده -

لم أكن أستطيع شراء بالطو فرو لزوجتى وحبيبتى .. فاشتريت كورك أسود يادوب يوضع على الياقة ..
اشتريت أيضا أول طاقم أطباق "بيركس" تتحمل السخونة العالية .. وأول مجفف شعر روتيل ..
بعض هدايا بسيطة لأخوتى والأحبة .. تبقى معى بعدها 400 دولار وكان وقتها الدولار قيمته أقل من الجنيه ..
استطعت بها أن أكمل باقى المطلوب مقدم ايجار .. وثلاجة ايديال .. وتليفزيون 14 بوصة أحمر صغير أبيض وأسود ..

كنت أكتب فى كل يوم رسالة إلى زوجتى .. أشرح لها كل شئ بالتفصيل .. فتقول لى أنها ترى بعينى وتسمع بأذنى ..

أول الأشياء .. له سحر خاص .. أول مرتب .. أول شقة .. أول شئ فى جهازنا كان مطبخ إيديال من قطعتين .. وضعنا فيهما كل ما نملك .. بعض من مفارش مشغولة بالكروشيه .. بطانيتين صوف صينى عاديتين لكننا وضعنا عليهما زهرتين كبيرتين .. واحدة حمراء .. والأخرى زرقاء .. وإطارين بنفس الألوان .. بعض الستائر ..

نعم أول الأشياء .. فما بالك بأول رحلة بالطائرة ؟




أول الأشياء على صغرها .. هى أروع الأشياء

14 comments:

sa7arkash said...

انا اول تعليق انا كمان عاوزة هدية

مش عارفة أقول حمدالله على السلامة...ولا نعتبرك مراسلنا فى الخارج


اسلوبك فى السرد متميز جدااا...واكتر من رائع..وبيشد القارىء فعلا...حسك القصصى عالى اوى
أقولك حاجة...بيقكرنى بأنيس منصور فى أدب الرحلات....بجد والله مش بجامل


اما بخصوص اوائل الاشياء....فعندك حق هى غير قابلة للنسيان...فهى اجملها على الاطلاق

Sherif said...

الرائعة سحر

دائما رافعة معنوياتى

أنا فى مصر الحمد لله .. طبعا ليكى هدية

مش عارف أوصلها ازاى

princess dodo said...

حمد الله على سلامتك يا جميل
فعلا أول الأشياء لها سحر خاص
الحب الأول
والسفر الأول
وأول رسالة حب

جميلة رحلتك يا شريف
وحمد الله على السلامة تانى


تحياتى

ra7eel said...

حمدالله على السلامه
اتارى مصر نورت
يارب تكون استمتعت برحلتك
اذا كنت انا استمتعت فعلا وانا بقرأ تفاصيلها فما بالك انت؟
تحياتى لك ولزوجتك
ربنا يهنيكوا يارب

Arabic ID said...

الشيكولاتة السويسرى فيــــــــــــــــــــــــن؟؟؟؟

معلش ممكن أعدى أى حاجة إلا نصيبى منها

ها خاصمك...، طيب قولى طعمها ايه على الأقل؟؟؟

******

يا سيدى الحمد لله انك جيت بالسلامة

Sherif said...

أصدقائى وأحبائى وأقرب الناس الى قلبى ووجدانى

مش عارف أقول أيه .. كل هذا الحب وهذه المشاعر المتدفقة والتى أحمل لكم أكثر منها

يكفينى هذا .. ويكفينى أن تزورونى كما أزوركم وكلى اشتياق لما تضيفون من لمسات رقيقة تعطى للحياة ألوانها بدلا من الأبيض والأسود

لاتهتموا كثيرا بأن تكتبوا تعليقا فأنا أسعد تماما بزيارتكم .. أحيانا أشعر بأن الكتابة تصبح صعبة خصوصا وربنا يكتر الحبايب

اللى يقدر يكتب ان شالله
Hi
بس يبقى كتر خيره وإن لم يكن مش مهم خالص يكفينى تشريفكم

لكم كل الحب والإعزاز

Sherif said...

الشاب الوسيم
Arabic id

الشيكولاتة موجودة وكل حاجة .. قوللى أقدر أبعتهالك ازاى؟

الله يسلمك ويسعدك ويبارك لك دايما

klmat said...

حمد الله على السلامه
حقيقى خدتنا معاك فى رحله
من المشاعر الجميله
وفرحانه فى صديقك رفعت
والناس الحلوه اللى قعدت جنبه
الاعمال بالنيات ههههه
كنت حاتبقى جنبه
صحبه جميله
حقيقى اسلوب حضرتك
جميل جداالبوست رائع
والمدونه كلها
رائعه
تحياتى وسلامى

اجندا حمرا said...

عوده حميده ياشريف و ألف ألف حمدلله علي سلامتك وحشتنا اوي اوي بجد

ايه القصه الحلوه دي بقه؟حواراتك جميله ياشريف و اسلوبك بسيط و سلس و ده الي بيشدني لكتاباتك

كويس انك حققت امنيتك في السفر و يارب ياسيدي تزور كل بلاد العالم دي برضه امنيه من امنياتي و دايما بتكلم مع حبيبتي عنها و هي موافقاني و انشاء الله يارب نحققها هي و انا

فعلا كل مكان جديد بيكون له سحره و اول حاجه في كل حاجه بتكون جميله عشان بتكون لسه جديده علينا

حمدلله علي سلامتك ياشريف و ربنا يسعدك دايما و تحقق كل اللي نفسك فيه

تحياتي ليك ياجميل

توتة توتة said...

اولا حمد الله على السلامة
ثانيا انت لازم توضح للناس انك بتكتب بجد مش بتحكي حدوتة ثانيا لازم تكتب التاريخ في الاخر عشان الناس تفهم انت بتتكلم عن ايه و امتى و الاحداث تبأى واضحة شوية "تاريخ حدوث الحدث مش تاريخ كتابتك ليه"
او تكتب ملحوظة على اللذين لم يفهموا الامتناع عن التعليق او كتابة اي شيء اخر لا علاقة له بالقصة
او تمنعني انا اني ادخل اشوف التعليقات عشان مش بعرف امسك نفسي من كتر الضحك

Sherif said...

توتة توتة

ليكى حق طبعا
بس أنا أحب إن كل واحد يراها من المنظور اللى يحبه

تفرق كتير إن أول رحلة تكون دلوقتى أو من فترة ؟

أول رحلة هى دائما أول رحلة فى نفس كل واحد بنفس المؤثرات والانفعالات

إيه رأيك؟

Miss Egyptiana "Trapped Soul" said...

الآن نحن داخل الكارت نفسه

نفس احساسى عندما زرت الولايات المتحده الامريكيه ... بعد تلك الزياره عرفت لماذا يقولون علينا اننا نعيش فى الصحراء

برضه ذكريات اول الاشياء جميله جدا

على فكره التليفزيون ال14 بوصه الاحمر كان برضه اول تليفزيون فى حياة والداى

واضح انه كان موضه اوى الايام دى

توتة توتة said...

ماشي ماشي

Sherif said...

لا والله ما هى موضة .. ضيق ذات اليد

Grundigال
كان موجود من سنة 60

تحياتى