Monday, November 19, 2007

أحيانا كان بيتهيألى أموتك وأموت نفسى عشان ارتاح .. -
معقول يابابا ؟ -
أما تلاقى ابنك بيخبط دماغه فى الارض من الوجع .. وحاطط ايده على جنبه مش بيشيلها .. ولا فيش نوم أنزل بيك الف الشوارع وعالدكاترة مجرد أنى الاقى مسكّن .. مافيش
قد كده الألم رهيب ؟ -
ي- ياه .. كلمة رهيب دى بسيطة .. واخيرا رحنا عن طريق هاشم فؤاد الله يستره .. كان فيه دكتور ألمانى بيمر فى زيارة للقصر العينى
هاشم فؤاد بتاع كلية الطب ؟-
آه .. ماهو صاحبى من أيام الابراهيمية فى ثانوى .. عملنا الاشعة .. طلعت حصوة فى الحالب الايسر -
ايه ده ؟ وانا عندى اربع سنين ؟ -
تخيل ؟ -
من ايه ده ؟ -
لأ من ايه حاجات كتير .. وانت فى الحاجات الحلوة ماتتوصاش .. خصوصا الشيكولاتة .. والمانجة والفراولة -
ماكل الولاد بيحبوا الحلويات -
بس مش بياكلوا علبة شيكولاتة فى يومين ويخبوها من اخواتهم تحت السرير عشان هما بس اللى ياكلوا منها .. والا المانجة ..مش فاهم ليه اما تيجى بيحصلك ذعر .. ونتخانق مع ماما عشان تشيلها من قدامك
وبعدين -
ماكانش فيه حل غير عملية .. كمان الطب ماكانش لسه اتقدم زى النهاردة تعمل عملية بالليزر ولا تفتت حصوة بالمنظار لافتح ولا دياولو خفنا يعملها لك واحد من هنا .. مع ان اساتذة زمان احسن ميت مرة من دلوقت .. بس الامكانيات ..
وماما كان ايه رأيها ؟ -
ماما لحد كده مقدرتش تستحمل .. تقولها فتح بطن تقولك مستحيل حد يجرح ابنى .. شوفوا له دوا -
و بعدين ؟ -
ماجاتش يوم العملية .. لحد فين بعد ماخلصنا .. روّحت انا اطمنها ان كل حاجة الحمد لله كانت كويسة .. بعد العملية لستة الممنوعات كانت-
طويلة جدا .. الشيكولاتة .. الفراولة .. المانجة .. السبانخ والخبيزة .. البن .. الكاكاو ..تعرف أنا حاطيت لك الحصوة فى ميدالية شيك على شكل ترموس عشان ماتنساش ابدا
وهى فين ؟-
فين ايه ؟ هو فيه حاجة بتفضل معاك .. ما ضاعت ..-
والمدرسة ؟ -
إلا المدرسة .. شوف الخواجات .. كانوا زمايلك كل واحد يييجى يوم ينقل لك اللى خدوه ويذاكر معاك .. وفى آخر يوم عملوا لك امتحان مخصوص فى البيت
قد ايه لطاف -
لا وبعد النتيجة ما ظهرت ونجحت كل الفصل جه يحتفل معاك ومعاهم مدموزيل أيلين .. ومسيو دى لابان مدير المدرسة -
معقول المدير كمان ؟ -
وجابوا لك حتة هدية عبارة عن بيضة كبيرة مليانة بومبونى -
الله على الجمال -
عارف الهدية دى كانت عبارة عن ايه ؟-
ايه ؟-
!! شيكولاتة .. -
برضه ؟ -


من عمر اربع سنين .. عمليات ..

7 comments:

carol 2002 said...

حمدلله على السلاااااامه يا قاهر الشيكولاتة
;)

انا فى رأيى تسمى مدونتك
ذكريات من زمن الشاب النشيط الصاغ قول أغاسى شريف أفندى قاهر الشيكولاتة
:D :D

بس إبئه هات حته
;)

Sherif said...

ربنا يخليكى ..

ليه مش يتحكى عنك كارول

اتمنى ان اقرأ عنك

Miss Egyptiana "Trapped Soul" said...

اعجبتنى الصورة جدا

الشقاوة والبراءة تقفز من عينيك
تحيط عالمك بالبهجه والمشاكل الصغيرة التى تجعل من الاحداث ذكرى جميله

قصه جميله ولو انى مبحبش الشيكولاته

حمداً لله على سلامتك وتحياتى على البوست الجميل

Sherif said...

Egyptianna,

مش عارف أقول لك ايه

بس ممكن تقوليلى .. ليه مش بتحبى الشيكولاته ؟

ماتقوليش diet :)))

Miss Egyptiana "Trapped Soul" said...

لا والله مش دايت خالص

الفكره انى مبحبش السكريات
ومبحبش الشيكولاته
منى لنفسى من غير اسباب

اكلها كل شهر مرة
وعمرى مشتقت ليها
عادى

Sherif said...

كارول

أحلى تعليق منك أما بتقولى إن الشمع كتير فى رسمى
" ..هو كنت بترسم والنور مقطوع ؟"

قعدت أضحك ربع ساعة

ra7eel said...

)حلوة دايما ذكرياتك
اللى بنعشها معاك
خالص تحياتى