Wednesday, November 28, 2007

عايزين نشترى مسدس ونرخصه .. -
ليه ؟ -
للواد السواق .. أما بيطلع يعتق بالتريلة بالليل .. الحرامية بيتنططوا عليه ويسرقوه .. -
و.. دى عايزة مسدس ؟-
أما بيعرفوا إن السواق مسلح بيخافوا .. -
وإيه كمان ؟ -
الأتاوة ..-
لمين ؟ -
الحاج عرفان..-
اللى بيقعد عالقهوة ؟ -
عليك نور .. وإلا مش هياخد دور أبدا .. ادينا جربنا ..-
حاجة تانى ؟ -
وبرايز كل يوم .. أربع نقط عالطريق ..-
وايه كمان ؟ -
كاسيت بقى .. الليل والمشاوير طويلة ..-
.. -

لم يكن يدور بخلدنا فى يوم أن مشروع عربة لورى "دويتز" يمكن أن يجر أرجلنا إلى مثل تلك القائمة ..
خمس مهندسين سيارات من الشباب رأينا أن نعمل مشروع مشترك .. كل منا ساهم فيه والحصة 500 جنيه .. هى كل ما كنت أملك بعد ماباعت زوجتى شبكتها عن طيب خاطر ..

قررنا شراء لورى وتريلا بحالة معقولة بمقدم .. ثم نقسط باقى الثمن على سنتين ونصف كل شهر .. القسط والنفقات من شغل اللورى .. كذلك كانت الخطة ألا نأخذ منه شيئا .. فاذا انتهى السداد نبيعه .. واذا كان الأمر كسبان .. نشترى لورى آخر وهكذا
وفى يوم ..
الواد السواق فى النيابة ..-
إيه ؟ -
اللورى عدى على رجل بنت فى المنصورة ..-
يانهار أسود ..-
الحمد لله .. اللورى كان فاضى .. وستر ربنا ان البنت ماجرلهاش حاجة ..-
إزاى ؟ -
سبحان الله .. أما اتزحلقت صرخت .. كانت رجلها بين اللورى والمقطورة .. والواد فرمل ساعتها ..-
لحق ..-
ستر ربك كان اللورى لسه فاضى .. وقف مطرحه .. البنت نقلوها المستشفى .. والواد السواق متحفظين عليه .. اللورى ممكن نخلصه لأن المعاينة خلاص .. البنت بقى .. الخضة وكده .. بس هى مافيهاش أى حاجة ..عاوزين نزور أهل البنت ونطمّن عليها .. كده يلزمنا كام يوم على مانشتغل تانى .. احنا علينا طلبات قد ايه ؟
أربعة .. بس احنا هانحتاج سواق تانى ..-
وصاحبنا ؟ -
محجوز موقتا ..-
مش محتاج تباع ؟ -
لأ .. التباع زى ماهو .. بس من هنا ورايح ..-
إيه ؟ -
لازم يبقى لنا سواق احتياطى .. بديل لده .. مرة تعب .. مشكلة زى دى .. سافر .. يبقى عندنا حل .. وحل فورى .. انت عارف اليوم بيكلفنا 100 جنيه
ماشى ياجماعة ..-

هكذا كان المشروع ..
بدأ وحساباتنا الدقيقة غير اللورى والتريللا فيها طاقم كامل من قطع الغيار .. مارش كامل ودينامو وكام فردة كاوتش واسطوانة دبرياج .. سخرنا فيها كل مهاراتنا الفنية التى تضمن تحرك مستمر للورى ..

وانتهى بمسدس واتاوة وبرايز وسواق احتياطى ومصروفات وعديّات وكاسيت وكفالة و ..

بعد السنتين ونصف سددنا اللورى والتريللا .. وحسبنا الأرباح والخسائر .. ووزعنا الانصبة لكل واحد ..
500 جنيه !!



يادار مادخلك شرّ ..

6 comments:

Miss Egyptiana "Trapped Soul" said...

لا يكفى ان تفهم فى الميكانيكا لتقوم بمثل هذا المشروع

دى زى المافيا بالظبط
ليها ناسها، وكل واحد له منطقته

معلش المهم ان ال500 جنيه رجعوا

carol 2002 said...

بجد بجد .. هايلين
هى ديه الافكار ولا بلاش

مشروع جميييل ... لأ و مسداسات و إتاوة .. دا إيه الافلام العربى ديه

طيب ماكانش معاكم

الاستاذ فريد شوقى ؟

:D :D


بجد يا بختكم
الحياه كان فيها الامور واضحه كده
عاوزين إتاوه ؟ .. إديهم إتاوة

يعنى بمنتها الوضوح
:D


على فكرة .. المشاريع دى فعلا جميلة
مش مهم كسبت منها ولا لأ
بقدر ما إستفدت منها إيه

و أكيد إستفدت حاجات كتيرة

جميلة ذكرياتك
تحياتى (^_^)

(green eyes) said...

مشروع جميل بس مش درستوه كويس
يلا حصل خير بس تعرف انت لو حتى ماستفادتش ماديا اكيد استفدت خبرة ودي اكيد هضيفلك حاجات كتييييير
تحياتي لك

Sherif said...

Egyptianna,

فعلا مافيا .. معلهش .. شبان متحمسين .. بس مافيش خبرة

Sherif said...

Carol

أهلا وسهلا يافندم

لقد أسعدتم حظرتنا بحضوركم الميمون

صاغ قول أغاسى
شريف الكوردى

Sherif said...

Green Eyes

شرفنى حضورك وتعليقك
أتمنى أن أعرف رأيك فى لوحاتى