Thursday, November 22, 2007

نفسى أخدك فى حضنى -
أنا كلّى لك -
ياااه .. معقول ؟-
أنا مش مصدقة أنك قدامى .. ممكن امسكك ؟ -
أنا أهو -
أ- (أمسكت بذراعىّ وضغطت بأصابعها غير متأكدة) .. بحبك بعبلك وترابك زى مانت .. وصلت أمتى ؟
من ساعة .. يادوب سلمت على أمى واخواتى .. كنت عاوزأشوفك أول واحدة -
قاعد قد ايه ؟-
س 24 ساعة .. هامشى بكرة بالليل -
على طول كده ؟-
احنا لسه طوارئ .. ماحدش عارف هانخلص امتى .. كل حاجة ممكن تولّع من جديد -
ياساتر يارب .. تانى ؟-
.. الدنيا كلها متشنجة .. أنا جيت مصر فى ست ساعات .. لفة طويلة من دمياط للمنصورة لشبين الكوم لطنطا لهنا .. طريق المعاهدة مقفول .. عمليات ..
عارف بقالى قد ايه ماشفتكش؟-
شهر ؟-
اربع شهور -
ماكانش ممكن ننزل بسهولة .. أول مابدأ وقف اطلاق النار .. إدونا 24 ساعة .. بالدور طبعا -
جواباتى كانت بتوصلك ؟-
آه .. بس بصعوبة .. الوصول لينا مع التحرك المستمر صعب .. احكى لى كنتوا عاملين ايه هنا ؟-
الناس ولا أنا ؟-
كلكم -
الناس مش مصدقة اللى بيحصل .. زى مايكون حلم .. وخايفين يصحوا يلاقوا الكلام ده مش حقيقى -
وانت ؟-
أنا كنت بموت فى اليوم ميت مرة -
ليه ياقمر ؟-
من المناظر اللى كنا بنشوفها فى المستشفيات .. اللى مكسور واللى محروق ياحبايبى .. واللى .. الشر برّ وبعيد .. ضاع ذراعه .. يا ساتريارب
مش حرب ؟-
حرب .. وكل مافتكرك أقول يارب يرجع لى سليم .. لىّ ولأهله .. يارب ماتسيئنى فيه أبدا -
يعنى هاكون أغلى من دول ؟ . .-
ربنا اللى بيحفظ .. ماليش دعوة أنا بقى .. عايزاك لى لوحدى .. جبت لك مصحف عشان يحميك -
ان شالله يخليكى -
جبت لى ايه ؟-
طلقة رشاش -
رشاش ؟ -
أقرب دفعة رشاش نزلت جنبى من طيارة فانتوم بتطارد قول .. دى واحدة منهم -
ياحفيظ .. لأ بلاش الحاجات دى -
هى دى حاجة تخوف ؟ .. أمال الموت فى كل لحظة يبقى ايه ؟ .. عارفة لما يتلغى الزمن من ذاكرتك ؟-
يتلغى ازاى ؟-
يعنى أما تعيش اللحظة بلحظتها .. ماتقدرش تقول كلمة بكرة .. لأن بكرة ده بعيــــــد قوى .. انت ماتعرفش هاتعيش الساعة الجاية ولا لأ فى ثانية .. خلاص .. قنبلة .. دانة .. قنابل موقوتة .. وانت مش قاعد فى حتة آمنة .. عمال تتحرك من هنا لهنا وسط كل الخراب ده بتسابق الزمن ..
وزمايلك ؟-
.. احنا زى مايكون كنا فى حمى كلنا .. زى اللى سارقاه السكينة .. مشاعر متداخلة .. حماس مع شجاعة مع قلق مع خوف .. المجروح بنشيله ونخليه .. والشهيد نوديه بعيد .. ونحفر وندفنه بهدومه .. مافيش غيرك هناك ولازم نعمل كل حاجة بنفسنا
بتفكر فى أهلك ؟-
ولا واحد كان قادر يفكر فيهم .. زى مايكون صورة ممسوحة مالهاش ملامح .. موجودة .. بس انت م شايفها .. ملخوم دايما باللى فى ايدك .. بيطاردك عقرب الثوانى قبل الدقائق ..
ياحبيبى .. حمد الله عالسلامة .. هاتيجى تانى امتى ؟-
مش عارف -
نفسى افرح زى كل الناس -
تفتكرى هاعيش ؟-
الاعمار بيد الله -
حاسس إنى مش هاعيش -
ليه بتقول كده ؟-
اما الواحد يموت فى كل ثانية .. يبقى ده احساسه .. تعرفى أنا عملت ايه ؟ .. اديت كل الفلوس اللى معايا لاخواتى ولأمى يجيبوا كل اللى نفسهم فيه .. مافضلش معايا حاجة دلوقتى
يا حبيبى فداك أى حاجة -
أقدر أشوفك بكرة .. قبل ماسافر ؟.. مش عارف ان كنت هاقدر أشوفك تانى ولا لأ -
ان شاء الله هاتفضل تشوفنى على طول -
أنا لازم أمشى .. عايز أعمل حاجات كتير قبل مارجع .. والوقت ضيق .. ربنا يتقبل -
ان شاء الله هايتقبل .. مش عايزة اسيبك .. مش عايز حاجة اعملها لك ؟-
ادعى لى دايما -
ربنا يحفظك .. ويوفقك .. وينصركوا كلكم .. أمين يارب العالمين -




أول لقاء .. بعد الحرب

9 comments:

اجندا حمرا said...

المبدع دوما شريف

ديالوج متميز و مليئ بالأحساس ياشريف

دايما اللقاء بعد فراق بيكون مليئ بقوه الأحساس و الاشتياق و بنكون عايزين الوقت يقف عشان نفضل اطول فتره ممكنه مع اللي بنحبه

الأستمتاع بالحياه و اسعاد الأخرين من اللفتات الأنسانيه الجميله المعبره عن احساس مرهف

تحياتي لك علي الديالوج المتميز

و بتمنالك التوفيق و السعاده و الحب دائما و ابدا

Sherif said...

المتدفقة دائما أجندا

بقالك كتير ياجميل غايب

القمر غايب ليه

نحتاج جميعا تلك التلقائية المتدفقة التى تمتلئ حيوية ..

هى فى رأيى أفضل بكثير من المترددين الذين لايملكون الا السخرية ..

وفى النهاية تطويهم زوايا النسيان

كنت أتمنى بدلا من ذلك أن يدلوا بدلوهم ..أين الشجاعة

carol 2002 said...

إيه ده مش تقول كنا جينا نحارب معاكم
نبله أو ظلطه أى حاجه تنفع برضه
:D

بجد أول مرة أحضر قصه حقيقية بالجمال ده
إسلوبك واحه جميلة بتجول فيها بفكرى و خيالى مع كلماتك فى سرد الاحداث

بجد فترة صعبه جدا .. مجرد التعايش بفكرى فيها .. بترعب


و بعدين حد يجيب لحببته طلقة رشاش ؟
أومال بعد كده جبتلها هديه إيه ..القتيل نفسه !؟

لأ رومانسى رومانسى مافيش كلام
:D :D


رائع يا بطل
;)

Sherif said...

الرقيقة دائما كارول

الا معايا أنا بس

فيها ايه يعنى طلقة رشاش ؟
هى اللى كانت فى جيبى ساعتها.. بس أنا مش محمود يس فى فيلم الرصاصة ..الفيلم كان بعد الحرب

تسعدنى دائما زيارتك .. وتعليقاتك ..

يارب تتيجى على طول

Arabic ID said...

الحمد لله انك بخير وسلامة

بجد اتنمنى لو كنت معاكم

الاحساس بالحرب اللى انت وصفته ده فعلا متعب ومقلق
ولكن أكيد بتتعلم حاجات كتير وغير فيك حاجات كتير

klmat said...

حديث ممتع
مافيش اجمل من الحب الصادق
األأسلوب رائع
ربنا يحفظك

Sherif said...

الشاب الوسيم
Arabic ID

ألرائعة كلمات

اعظم تغيير حصل هو ان هذه القصص ادتنى الفرصة انى اتعرف على ناس زيكوا بالجمال والمشاعر دى

Miss Egyptiana "Trapped Soul" said...

فى البدايه احب ان اعتذر عن تاخرى على التعليق على هذا البوست ، ولو انى اعتقد انه من حظى ان اقرا البوست الاخير قبله حتى يكون التسلل مظبوط

رحله العوده ثم اللقاء
لقاء تتزاحم فيه مشاعر الحب والقلق والخوف والوداع والشوق
--------------------------------

عارفة لما يتلغى الزمن من ذاكرت"

اسوقفتنى تلك الجمله كثيرا، ربما لانى اعرف معناها وخباياها كما يعرف الدليل طريقه فى الصحراء...

الزمن... هذا البعد القاتل الذى يستعبدنا منذ لحظه ولادتنا، وكانه يحملنا ليسلمنا فى نهايه الطريق الى بعد اخر غير معلوم

فقط بالاحداث المتتاليه الجسام يتضائل ... ولكن ما يلبث ان يعلن عن نفسه بقوة... ويشير الى عداده الذى لا يتوانى عن حساب الايام

-------------------------
عزيزى ... كم مرة ساقولها
كم تمنيت الحياة فى تلك الفتره
كم تشوقنى كلماتك لتذوقها

مرة ثانية ومش اخيره
تسلم لنا يا بطل
تحياتى

osama said...

بأي مداد تكتب .. مداد من روح
تلك الروح التي كانت على المحك..
حوار دافئ عميق... من اعماق قلبك المنصهر...

ألا زمن ..؟
وأي زمن هذا الذي لا شيء فيه سوى موت بطيءننتظره كي نتخلص من من ألم اشد ألم انتظاره...

استمتعت بكل حرف كتب
دمت بكل ود..
خالص تحياتي