Friday, January 11, 2008

انا مش فاهم ايه حكاية الحمار ده .. -
اللى بيعدى الساعة خمسة كل يوم ؟ -
انت خدت بالك ؟ -
طبعا .. وبانتظام .. -
عارف تبع مين ده ؟ -
تلاقيه بتاع الجماعة العرب اللى بيمروا من بعيد .. -
بس فيه حاجة غريبة .. -
ايه هى ؟ -
انا لاحظت انه بيمر لوحده .. بعرض الورشة .. ويقعد يتمشى .. بعدين يتلكع شوية هنا.. -
وشوية هناك .. وبعدين ..
يخرج مع الناحية التانية .. مش كده ؟ -
بالضبط .. تفتكر ؟ -
آه .. افتكر .. افتكر ان دى حاجة مريبة .. -
على فكرة لازم نراقبه .. ونفهم ايه الموضوع ده .. -

كنا فى أحدى ورش القاعدة بالهاكستب .. ولم يكن سورها كافى لتحويطها .. فكانت هناك أجزاء منه من السلك الشائك .. الذى لم يمنع بطبيعة الحال تجوال بعض البدو الغجر من بعيد .. واحيانا عبور ما يرعون من شياه وماعز وغيرها لهذا السلك الضعيف .. ليأكلوا من خشاش الأرض وماتيسر من كلأ
وكان من بينها هذا الحمار ..

الا ان الحمار هذا كان امره غريبا .. فكل هؤلاء يرعون فى رفقة اصحابهم من بعيد .. ويخافون اذا بعدوا عنهم .. ماعدا هذا الحمار .. كان يتجول بانتظام فى ميعاد محدد وكأنه يقوم بمرور يومى .. يتفقد فيه المكان .. ويتسكع كما يحلو له .. ثم ينصرف .. هكذا فى كل يوم

وفى يوم راقبناه .. ثم اقتربنا منه فلم يهابنا .. ولاحظنا وجود خرجين على جانبيه .. تفحصناهما .. فبان كل شئ ..
مجموعة من قطع الغيار .. والفوانى الجاز .. ورولمان البلى ..
اذاً هناك بالتأكيد من يمّونها من الداخل .. يعنى
Inside Affairs
واستمرينا فى المراقبة .. ولابد أن الضالع فى هذا الموضوع كان قد انتبه .. وعبثا تحاول .. ففى الأيام التالية كان الحمار يدخل ويخرج خالى الوفاض

أبلغنا كبير المهندسين فقرر انتقاما من هؤلاء ان يصادر الحمار وهكذا اصبحنا نستفيد منه فى النقل الداخلى بين الهناجر المختلفة .. وكذلك فى المرور بين الطرقات التى لايمكن للسيارات المرور منها .. وهكذا تحول الموقف الى موضوع مفيد .. خصص له جندى مخصوص لرعايته .. واستخدامه حسب الطلب

الغريب فى الأمر انه لم يظهر له صاحب .. ولم يسأل عنه أحد .. مما بدد شكوكنا فى أن الأمر فعلا ورائه اناس استغلوه جيدا .. واستولوا على بعض الاشياء .. كما رأينا نحن اننا حصلنا على قصاص عادل بالاستيلاء عليه

ثم ظهرت لنا مشكلة أخرى .. فرعاية هذا الحمار تحتاج الى مصروفات .. مابين عليق وبرسيم .. وعلاج اذا لزم الأمر وخلافه .. ولابد ان يظهر ذلك بشكل قانونى وفى حسابات معتمدة


وهكذا تم تأميده على كانتين الوحدة بحيث تظهر كل المصروفات فى الحسابات الشهرية .. وللمرة الأولى وجدت الهيئة المالية بنودا لم تتعودها .. برسيم وتبن وتكاليف انشاء ايواء وغير ذلك ، مع ان هذا الأمر كان معتادا عند استخدام البغال فى الجبال الوعرة لبعض المناطق .. أو الجمال عند الحدود وهكذا
الا أن ظهور الحمير بالمنطقة المركزية بدا غريبا حيث لاحاجة لذلك هناك

عادت المناقضة بعد المناقضة واصبح هذا الحمار عبئا بعد ان كان شيئا مفيدا .. واصابتنا الحيرة .. ماذا نفعل به لنسوى حساباتنا للمرة الأولى والأخيرة ؟

!! واخيرا اهتدينا للحل .. بعناه بالمزاد العلنى .. ووضعنا ماحصلنا عليه بدلا من التكاليف



حمار يتجول

14 comments:

ra7eel said...

يعنى كده ظلمتوا الحمار
هههههههه
واخرتها يتباع فى مزاد
هو ده جزاءه

مازلت مستمتعه بذكريات حضرتك

خالص تحياتى وتقديرى

Sherif said...

ra7eel العزيزة

ممكن من فضلك بلاش حضرتك ؟

blackcairorose said...

آه البيروقراطية المصرية

افتكرتها

Sherif said...

blackcairorose

الحقيقة فعلا أن البيروقراطية سبب مباشر فى معظم مشاكلنا

Desert cat said...

يعنى ده جزاء الحمار اللى آمنكوا على نفسه وحياته تبيعوه فى المزاد
ده حتى حمار بيفهم
بيمشى لوده وحافظ الطريق وبمواعيد معينة

Sherif said...

desert cat

اشكرك لزيارتى أولا

ثانيا الحمار ده بالذات كان بيقوم باعمال مريبة يعاقب عليهل القانون

ثالثا طب كنا عملنا ايه؟

تحياتى اليك

Arabic ID said...

صدق اللى قال

الجيش بيقولك أتصرف...

تحياتى ليك

Sherif said...

الشاب الوسيم

أشكرك لمرورك

karakib said...

لذيذة
و دمها خفيف كمان :)

Sherif said...

karakib

اهلا بك فى مدونتى

(وارجو (يارب

ألا تكون الأخيرة

someone in life said...

ههههه حمار يتجول منفردا و الله يا بخته كويس انه لقي ناس طيبين تأكله و تتحمل مسئولية مرضه و ان كان بيعه في المزاد اثر علي نفسيته ارجو ان صاحبة الجديد يكون طيب و عطوف و الحمدلله انكم مش عملتم زي الحكومه لما بتعدم الحصان الغير محتاجين له و لا زي البشر اللي بيرموا الناس طالما مالهومش لازمه في حياتهم و اهو تجديد و احلال ( مش بيقولوا كده في القطاع العام و لا ايه )

Sherif said...

someone in life

انت قطاع عام ولاقطاع خاص؟

someone in life said...

ههههه لا عمري ما اشتغلت في القطاع العام انا مش غاويه روتين و لا بيروقراطيه مش ماشيه مع شخصيتي انا باشتغل في منظمة غير حكوميه أجنبية معفاة من الضرائب يا فندم

Sherif said...

someone in life

ربنا يوفقك ويبارك لك .. تكلمتى بمنتهى الحماس عن القطاع العام

تسرنى زيارتك