Thursday, February 7, 2008


عام 69 ..

.. كنا فى السنة الثانية بالكلية .. ونهاية التيرم الشتوى
اجتمع معنا مدير الكلية بالمدرج الرئيسى ليناقش معنا ادائنا طول التيرم

عندما دخل سكن كل شئ .. كأن الأرض توقفت عن الدوران .. ولفترة ظل يحدق فى عيوننا جميعا .. باديا على وجهه غضب على نحو ما ..
فهمنا من نظراته انه غير راض عن ذلك الأداء .. وحين انطلق آذان المغرب تمتم لنفسه بكلمات لم نتبينها .. قلنا انه دعاء .. وفى انفسنا دارت وساوس كثيرة تنصب فى اتجاه واحد .. نوع من التربص بنا لأنه غير راض

بعد الآذان .. نظر الينا نظرة مرعبة وهو يدور بعينيه فى الوجوه الشاحبة امامه .. واخرج المانيلا من الحافظة
هذه المانيلا هى بيان من الورق .. ينطوى على بعضه كالاكورديون .. وفى كل صفحة اسماء فصل كامل بالدرجات التى حققها كل منهم
هذه المرة كانت هناك دوائر كثيرة حمراء حول معظم الدرجات .. معنى ذلك كثرة درجات رسوب .. قال
ايه الكحك ده ؟ .. ماشتغلتوش التيرم ده ؟
الجميع تسمرت عيناه على المانيلا دون كلمة واحدة ..
سعيد محمود تانية ميكانيكا ستة .. فين ؟ -
وانتفض احد الاشاوس واقفا
(ميكانيكا ورياضة ( هذه مواد الرسوب -
عبد اللطيف حفنى .. تانية ميكانيكا اربعة .. ميكانيكا ورياضة -
جمال محسن .. تانية كهرباء خمسة .. رياضة وتحكم -
وهكذا استمر الحال حتى انتهى بعد ساعة كاملة .. وهكذا أيضا كان ثلاث أرباع المدرج واقفا ..
سكت لدقائق .. ثم قال
خبراء بييجوا بالعملة الصعبة .. ومراجع بنستوردها .. وأحسن أساتذة فى الجمهورية .. وكل الامكانيات مسخرة -
وبعدين واكلين شاربين لابسين .. يبقى فلوس البلد بتروح عالفاضى .. وتبقوا محتاجين تربية من أول وجديد .. انا كنت فاكركم اولادى .. بس انا مش متشرف بيكم .. بسيطة .. يايسرى ..
افندم سيادة الفريق .. -
يستلموا جزم جديدة من أ.ت. .. مافيش اجازات .. هانشتغل .. وبعد الظهر .. الجزم دى تدوب طوابير زيادة -
تلات اسابيع ماينقصوش يوم

بعد قليل بدأت الاستعطافات .. ونداءات الطلبة فى يأس واضح .. فلم يحدث ان انتصر احد فى تاريخ الكلية على هذا المدير صعب المراس
يافندم ادينا فرصة تانية .. -
فرصة تانية ازاى ؟ .. معظمكم عنده ملحق فى مادة او اتنين .. يعنى التقدير لازم هيتأثر -
هاتعوضوا ازاى التيرم الجاى ؟
هانبذل أقصى جهد -
اللى جايب مقبول فى مادة .. لازم يجيب ايه عشان يحصل على جيد جدا ؟ .. ازاى ؟ -
الجميع ) هانجيب امتياز يافندم )
امتياز .. بعد المقبول ؟ -
أيوه يافندم -
سكت قليلا ثم قال
انتوا عارفين يعنى ايه ليلة القدر ؟ -
كان السؤال مباغتا بحيث ألجم الجميع .. فما علاقة ليلة القدر بما نحن فيه من كرب عظيم ؟
ثم اشار الى احدنا
قول انت -
هى يافندم ليلة مباركة نزل فيها القرآن -
(اشاح بوجهه واشار الى واحد آخر)
.. انت -
هى ليلة تتنزل فيها الملائكة .. وهى خير من ألف شهر -
( حمار .. ( يشير الى ثالث -
انت -
ليلة تكون فيه السماء مفتوحة .. فيستجاب كل دعاء .. -
أى دعاء ؟ -
أيوه يافندم ..-
حمار .. اقعدوا ..-
ثم قام الى السبورة التى خلفه وكتب
T = 2 T
ثم القى الطباشير والتفت الينا وقال
هى دى ليلة القدر -

ولم يفهم هذه المعادلة أكثرنا عبقرية وذكاء .. وخيم صمت عميق على المكان .. فى انتظار تفسير لهذا اللغز الغريب .. واخيرا قال
يعنى اللى بيذاكر ساعة .. يخليهم ساعتين .. واللى بيذاكر ساعتين يبقوا اربعة .. وهكذا .. -
ولما وجدنا صامتين ولسان حالنا يقول .. من فضلك .. ممكن تفسر أكتر ؟

انا عايز كل واحد فيكوا يجيب امتياز .. طيب .. كل واحد ربنا مديله قدرات مش زى التانى .. انا ممكن افهم الدرس فى ساعة -
يبقى اذاكر ساعة .. واحد تانى محتاج ساعتين .. يبقى يذاكر ساعتين .. وبكده يوصل لنفس نتيجة الاولانى .. ونفس مستواه .. النتائج اللى انتوا جايبينها بتقول انكوا كان لازم تضاعفوا الشغل .. هى دى ليلة القدر .. بعد ماتعمل اللى عليك .. السماء هاتبقى مفتوحة

انتهى الدرس ..


نوع من مديرى الكليات ..

13 comments:

carol 2002 said...

طيب بجد المدير ده عبقرى
عجبنى جدا ذكاءة بالرغم من شدتة

أحيانا مع صعوبة التجربة
نجد إننا تعلمنا أشياء كثيرة منها
و بالرغم من مرارتها فى وقتها

إنما عندما نتذكرها
نبتسم و نقول كانت أيام

ولا نستطيع أن ننسى إننا إستفدنا منها

تحياتى على القصة الرائعه
الممتعه هذه , و المشوقه بطريقه
تجبرنى على إستكمال القراءة بالرغم من ضيق الوقت عندى

تحياتى يا بشمهندس
على الموضوع الرائع هذا

ولكننا كنا نود ان نعرف
إيه أخبار الكحك معاااك ؟
;)

sa7arkash said...

مش معقول كل مرة بتشد جدا لحكاياتك..اسلوبك مشوق جدا..بس كنت عاوزة اعرف اية اللى حصل بعد كدة..قى الترم التانى

Sherif said...

Carol الرقيقة

كما انت رقيقة فى اللعب بالألوان هناك ايضا من يجيدون فن الحكاوى ..

ارجو الا اكون قد اضعت من وقتك الكثير .. وان تكونى على الاقل تسليتى قليلا بالقراءة .. وهكذا تكونى قد جددتى نشاطك لتمضى من جديد

أما مسألة الكحك هذه فانا أقول ان الستر واجب

تحياتى

Sherif said...

العزيزة سحر ..

اهلا بك من جديد

اما بالنسبة للتيرم التانى فكما قلت لكارول

ربنا أمر بالستر


تحياتى

someone in life said...

هههه انا لسة جايبة كحكه بس بسبب الاضطهاد علشان قلت رايي بصراحه في المغرور اللي بيدرس advanced management
اقدر اقول ده فرق الزمن و لا فرق الضمير ؟ علي فكرة قدرت احسب عمر حضرتك كام يا صاحب الزمن الجميل .. تحياتي

Sherif said...

someone in life

يسرنى مرورك دائما
مع اطيب تمنياتى بالتوفيق فى دراستك ومعلهش الكحكة دى
تتعوض باحسن منها ..
وان كنت لاانصح بتحدى الاساتذة عندنا لانهم ..ولا بلاش

تحياتى

princess dodo said...

يقولون:
هناك أربعه مربيين
1
الضعيف:
الذى يحكى لك
2
الممتاز:
الذى يشرح لك
3
المثالى:
الذى يقنعك
و
الأستاذ:
الذى يلهمك

.
.

ذكرنى هو بالأستاذ
وكم استفدت من درسه
من خلال كلماتك الجميلة

وبالمناسبة

أوحشتنى لوحاتك

.
.

دُمت بود

Sherif said...

Princess Dodo

يا مرحبا .. والله زمان

اعدك بشئ ارسمه ينزل قريبا .. وأرجو ان يعجبك

تعرفين تماما لأنك مبدعة اننى أتمنى أن أرسم حينما اشتاق للرسم

لكن للأسف .. يأتى الإلهام على مزاجه لامزاجنا

اسعدنى مرورك

Arabic ID said...

لم أحقق ليلة القدر أبدا فى حياتى
كنتم محظوظين لوجود من يعلمكم ويرشدكم

Sherif said...

الشاب الوسيم

الموضوع كله كان شغل فى شغل

مفتاح كل شئ عند هذا المدير

هو العمل

اسعدنى مرورك

Miss Egyptiana "Trapped Soul" said...

التعليم كان زمان
كل مرة اقرأ عن ذكريات الكلية ... اتمنى لو كانت دراستى الجامعية مختلفة

ما فعله ليس شدة فقط
انما درس فى المسئولية

تحياتى يا عزيزى

Sherif said...

Egyptianna الجميلة

يسرنى دائما مرورك .. والأكثر تعليقك

Anonymous said...

أما فى السنة الإعداديةلو تذكر فقد ساد الشعار التالى
شعار الكلية الفلانيه... رياضة.. طبيعة..... ووصفية
وقد كان هذا الشعار يتلى كما يتلى الشعار الحقيقى ولكن داخل الفصول والعنابر فقط

......... ماكس
فكرتنى بالذى مضى