Sunday, May 25, 2008

صباح الخير دودو شيئا -
هكذا كانت تلقى على لينا حفيدتى تحية الصباح .. ولأنها كانت تشاهدهم فى التليفزيون يتحدثون الفصحى خصوصا فى بلاد الخليج فقد استقر فى خاطرها ان هذه التركيبة هى المناسبة لتصبح على جدها
تذكرت اننى فى كتاب القراءة الرشيدة وأنا صغير كانت هناك قصة عن رجل غنى بخيل أسمه يعقوب .. كانت لديه جوهرة ثمينة لايفارقها أبدا .. حتى كان اذا نزل البحر ليعوم يخبئها فى جيب صغير فينزل مطمئنا وثروته ملتصقة به

!! .. إلا انه فى يوم نزل كعادته والجوهرة فى ذلك الجيب ففلتت وسقطت فى البحر لتبتلعها سمكة كبيرة
وكان أن جاء صياد فقير .. ألقى بشبكته فوقعت فيها تلك السمكة وفى بطنها الجوهرة .. فلما وجدها فرح بها
" القصة تبدأ هكذا " يعقوب رجل غنى ، ولكنه بخيل ..
ولاادرى لماذا استقر فى ذهنى أن كلمة يعقوب معناها " كان فيه " .. يعقوب رجل غنى يعنى كان فيه رجل غنى كما نبدأ حكاياتنا عادة .. وظل معى هذا الفهم لفترة لدرجة اننى قررت أن أستعملها مرة فى موضوع للتعبير مستعرضا قوتى فى اللغة العربية .. ولم انتبه لذلك الخطأ الفادح الا مع وجود صفر كبير مع شطب لتلك الكلمة بالخط الأحمر .. أزالا بعدها ذلك اللبس من رأسى نهائيا

كنت أتبادل تلك النوادر القديمة مع صديق العمر فى حوار عبر الهاتف .. والذى نازلنى بما هو أفدح فى سماعنا لكلمات الأغانى ليس بما
: يقال .. وانما بما يهيأ الينا .. قال
أنا نفسى كان عندى فى طفولتى مفهوم غريب جدا فقد كانت هناك أغنية لليلى مراد كانت تقول فيها : واشوف نفسى جنبك ده شىء موش بعيد .. العبد لله ظل حتى سن 30 سنة يتعجب كيف أن حبيبا يفتش فى جنب وكلاوى حبيبه بدعوى الحب ... فقد تصورت وفهمت النص كالآتى "واشوفلك فى جنبك ده شىء موش بعيد" وكنت استغرب الحاح ليلى على شق جنب حبيبها واستخراج كليته لفحصها وربما لسرقتها
ومثل ذلك أوبريت الليلة الكبيرة والتى كنا نسمعها يقولون فيها " ياغزال يا غزال .. العشق حلال بواب تانى دور .. خليتنى خيال " والتى لااعتقد أن اختلف عليها طفلان حتى تبينا أن " بواب تانى دور " هى فى الحقيقة "دوبتنى دوب " وهكذا استقام المعنى

غير أن اطرف مافى هذا النوادر ماحكى لى أن قريب له فى عصر التعليم الحديث بمصر المحروسة كانوا يحفّظون فيه الأطفال مواضيع الانشاء والتعبير التى تأتى غالبا فى الامتحانات

وفى يوم من الأيام وقد اقتربت امتحانات السنة النهائية للمرحلة الابتدائية .. استقر الأمر أو انتشر بين المدارس أن هناك موضوعا عن السوق .. 90 % جاى جاى كأحد الموضوعات التى يختار التلميذ أحدها..

وعليه فقد شمّر كل أستاذ عن ساعديه وأنشأ موضوعا جميلا عن السوق .. وبذل كل منهم جهده فى تحفيظ التلاميذ هذا الموضوع .. ومن ضمن هؤلاء كان هذا الطفل .. فجاء الموضوع الذى تقرر حفظه على هذا النحو

السوق مكان واسع رحب ترى فيه العربات هنا وهناك ، يقف بجانبها الباعة وهم ينادون بأعلى أصواتهم ليتعرف المشترون على "
منتجاتهم . وهذه العربات تجد عليها أصناف كثيرة من الخضروات فهاهو الفلفل الأخضر والجزر الاصفر والطماطم الحمراء الجميلة . وعلى الجانب الآخر هناك أيضا الفواكه المتنوعة مثل العنب الكهرمانى والبطيخ الأخضر . وهناك أيضا من يبيع الأدوات المختلفة التى
" يحتاجها كل منزل ..

: ثم جاء يوم امتحان العربى .. ووزعوا ورقة الأسئلة .. وجاء جزء التعبير كالآتى اكتب فى أحد الموضوعين الآتيين
ت 1- تتميز مصر بموقع جغرافى فريد يجعلها تقع فى منتصف العالم . أكتب كيف أن هذا الموقع يؤثر على التجارة العالمية شرقا وغربا وكيف أفاد ذلك الموقع مصر
ك 2- " كان الركاب متجهين الى أوروبا بالطائرة ، وفجأة سمع الجميع صوتا غريبا بالمحركات .. أيقنوا بعده أن الطائرة على وشك السقوط " احكى قصة عن هذا الحادث

وفوجئ الجميع بأن السوق ليس من بين هذين الموضوعين .. ومن بينهم طفلنا .. وبدأ يفكر .. هل يكتب فى موقع مصر المتميز .. وماذا يكتب وهو ليست لديه حصيلة جاهزة .. ؟ وبعد تفكير قصير قرر أن يكتب فى الموضوع الثانى .. فكتب

كان الركاب متجهين الى أوروبا بالطائرة ، وفجأة سمع الجميع صوتا غريبا بالمحركات .. أيقنوا بعده أن "
الطائرة على وشك السقوط وبينما هم مرتبكون حاول طاقم الطائرة تهدئة الركاب بلا فائدة .. فالمحرك تعطل .. وبدأت الطائرة تهوى الى الأرض
" .. ولكن لحسن الحظ .. سقطت الطائرة فى السوق .. وكان السوق مكاناً واسعاً رحباً ترى فيه العربات

هو السوق .. أما تعملوا ايه

53 comments:

قوس قزح said...

هههههههههههه

يعنى مفيش فايدة هتتكلم عن السوق مهما كان الموضوع ايه

انا كنت بسمعها دوبنى انا دوب
بس كنت بسمع بدل ياسى عجورة النار خسعة كنت بسمعها يا سى عجورة النار اسعى
و كتير غيرها كنت بسمعه غلط

و دلوقتى بشوف ده فى اولادى و بحاول اقولهم الصح لكن بردو مقنعين بانهم بيسمعوا صح و انا اللى بسمع غلط :$

أم أحمد المصرية said...

صديقي الفاضل شريف موضوع ممتع جدا خصوصا في ايام الامتحانات هو حضرتك ما تعرفش ان الكتب الخارجية تعمل ملحق لموضوعات التعبير المتكررة
تحياتي لك و ادعي لأولاددي يجي لهم موضوع السوق ههههههههه

Sherif said...

قوس قزح

دوبنى أنا دوب أصح شوية من بواب تانى دور اللى مالهاش لامعنى ولا لازمة

الولاد بيبقى دمهم أخف وهم بيستعملوا حصيلتهم الصغنونة فى اللغة .. عقبال ماتشوفى أحفادك

Sherif said...

أم أحمد المصرية

يعنى لاجديد فى عملية التحفيظ وهكذا الواحد اطمأن على العملية التعليمية

يارب يجيلهم اللى فى بالهم

بس على فكرة .. يقدروا يحوّدوا على السوق من أى موضوع ..مضبوط ؟

عدى النهار said...

:)
ولكن لحسن الحظ .. سقطت الطائرة فى السوق

طبعاً ده من حسن حظه هو مش الركاب
:)

Sherif said...

عدى النهار

ده بالتأكيد

ra7eel said...

ههههه
ايه ده ؟ هو ده بقى حسن التصرف اللى بيقولوا عليه
هههههههههه
طيب هو على كده عدى السنه اساسا ونجح

بس تعرف فعلا فى مواقف كتير واحنا صغيرين عمرها ماتتنسى ونفضل نضحك على نفسنا كل لما نفتكرها

تحياتى وتقديرى لك

قلب ينبض لله said...

جميله بجد
بوست جميل
الحفظ بئي مطلب ضروري في المدارس والكليات كمان واللي يزعلك بئي لما تبئي الكليات دي زي هندسه محتاجه فهم مش حفظ
بيعجبني اسلوبك في الكلام والحوار
تقبل مني كل التقدير والاحترام

Sherif said...

رحيل الرقيقة

هو عدى السنة .. لاادرى بسبب حسن تصرفه .. أم لأن الاجابات كلها معلبة ونتائجها مضمونة سلفا ..

يسرنى مرورك دائما

Sherif said...

قلب ينبض الى الله

لااتعجب أن كل شئ امتدت يده الى الجامعة
أشكرك لمجاملتى .. ولرقتك

بنت القمر said...

شريف
=======
مواضيع التعبير مفروضه مش عارفه زمان كان الوضع ايه
دلوقت كمان في حاجه اسمها الاستشهاد يعني تجيب ايه من القران او الحديث عشان تدلل علي الموضوع
يعني ايه عن حب العلم او النظافه
احيانا بيكون موضوع زي النيل ملوش ايه مناسبه
بس لازم يتصرفوا او بيت شعر بالمناسبه
فبنتي حافظه وجعلنا من الماء كل شيئ حي
احيانا الاستشهاد بيكون رخم وملوش لازمه محشور حشر
واحده صاحبتي مسيحيه سألتني طب انتو عارفين قرأن احنا مالنا ممكن نجيب من الانجيل
طبعا اسقط في يدي
حلو اسقط دي
وقلت لها ومالو
طبعا مش هي اللي صعبانه علي اد محصص الماده اللي ها يطالب بأنه يساوي الاستشهاد القرأني بالانجيل!!ا
:)))
مشكله
:))

Sherif said...

بنت القمر

أول ماقريت الاستشهاد .. افتكرته فى سبيل فى الله .. ولو ان بالحكاية اللى قلتيها فهت ان الاستشهاد له شكل تانى

يسعدنى مرورك دايما

Shimaa Gamal said...

الواحد دائما بيسمع حاجات غريبة فى الأغانى ، تخيل بقى لما تبقى بتسمع دبة النملة و تشغل أغنية 100 مرة و برضوا ماتفهمش هما ليه مصرين ينادوا على واحد إسمه و سعد و واحدة إسمها نبيه فى أغنية العيد فرحة بتاعت صفاء أبو السعود .
:) :)
فضلت سنين على ما فهمت إن المقصود سعدنا بيها مش سعد ، نبيه

مواضيع التعبير أيام الطفولة المشردة كانت هواية و على الرغم من إن المستر كان بيضرب بيها المثل إلا إنه عمره مادانى درجة حلوة ، علشان ماكنتش بسمع الكلام و أبتدى الموضوع بمما لا شك فيه و كنت شايفة إنه من الإبتذال إنى أحط بيت شعر أو حديث أو قرآن علشان الموضوع يطلع شكله حلو . و ماكنتش بكتب العناصر زى ما بيقول . إزاى أكتب العناصر و أنا لسة ماكتبتش
أهى أيام و عدت و المهم إن السوق فى الأخر نجاه
:)

someone in life said...

هههه الحمدلله مش ابني لوحده اللي عنده تفانين في اللغه العربية كده انا اطمنت على مستقبله انه ممكن يكمل و ينجح علشان كان ضغطي بيطلع من التحف اللي بيقولها مثلا كا بيقول على الحموضه ( احباط ) و يشاور على معدته و بيقول اللجن بدلا من اللجان و مش عارف يقول فوسفات بيقولي بوستات
و حاجات من دي كتير بس برافو انك اتصرفت ووقعت الطيارة في السوق و الناس ماتت علشان موضوع تعبير .. تحياتي

Sherif said...

Shimaa

الظاهر انى أثرت شجون ناس كتير والأكيد أننا فى احيان كثيرة بنسمع على مزاجنا

بس جميلة جدا سعد نبيهة

أسعدنى مرورك

Sherif said...

someone in life

حلوة قوى بوستات دى .. يعنى واضح ان كل الناس فى الهوا .. بالاخص وهم صغيرين

اطمئنى سيدتى على ابنك .. كلهم هذا الانسان

المـــفـــــــقــــــــوعـــــة مــرارتـهــا said...

ههههههههههههههههههههههههههه
مش ممكن ده ولد عبقري
اومال يعني يبقي ضيع وقته أونطي لازم يكتب عن السوق
تحياتي

كاميليا said...

ومثل ذلك أوبريت الليلة الكبيرة والتى كنا نسمعها يقولون فيها " ياغزال يا غزال .. العشق حلال بواب تانى دور .. خليتنى خيال " والتى لااعتقد أن اختلف عليها طفلان حتى تبينا أن " بواب تانى دور " هى
فى الحقيقة "دوبتنى دوب " وهكذا استقام المعنى
.......

ههههههههههههههههههه

بواب تاني دور

حلوة قوى

جميل قوى البوست

تحياتى واحترامى

Sherif said...

مرارتها

الراجل يعمل ايه ؟

يسرنى تعليقك

Sherif said...

كاميليا

حضورك يزيد الدونة نورا

Salwa said...

يااااااه

فكرتني بحاجات كتير
وأغاني كان الواحد بيفتكر شئ

وبعد سنين إكتشف الحقيقه
:)

بس بجد بقى موضوع التعبير والسوق جامد قوى

طفل زكي
طوع الموضوع لما يريد

بجد جميل

تحيااااااتي

سمراء said...

تلك هي الاسباب في ضعف اللغة العربية في مصر
التلقين والتحفيظ وعم الاهتمام بتنمية الحصيلة اللغوية ونطق الحروف بطريقة غير صحيحة ( ق- ك )على سبيل المثال
اما عن الطفل المبدع فهو حقا استخدم ذكاؤه للخروج من المأذق
اشكرك
سمراء

Sherif said...

salwa

دائما تسعدينى بزيارتك

Sherif said...

سمراء

مش خسارة الولد ده يتعلم عندنا؟

اجندا حمرا said...

العزيز شريف

يااه فعلا ياشريف ياما كانوا بيحفظونا حاجات لمجرد الحفظ و بس و لو قلنا مش فاهمين تبقي مشكله
عجبني الجزء بتاع الليله الكبيره اصل انا فيه حاجات كتيره زمان كنت بفكرها حاجه تانيه خالص بعيده عن الكلمه الأصليه بس لما كبرت عرفتها
:)

تحياتي ليك و حلوه ذكرياتك ياشريف
:)

دايما بتسعدنا بيها

Arabic ID said...

Dear Sherif

me also, this is weird how this happens???

O3'nyet laila morad beta3et "a7eb 2 sawa"

kont asma3ha

"ya sakeny matroo7 genya fe ba7rokom"

=========
Regards

appy said...

ههههههههههه هموت يا شريف من الاغانى لو قعدت افتكر لك مش هيخلصوا بجد
انا مصيبه فى الموضوع ده وخاصه انى كنتى غاويه ام كلثوم من صغرى وكنت بسمع كلامها كله غلط هههههههههههههه او الاغلبيه
بص يا شريف التعليم فى مصر بقى صعب قووووووى بجد حتى الكتب القديمه بتاعتنا رونقها باظ وخلاص

Sherif said...

المتدفقة أجندا

حضورك يثرى المدونة بلطفك وذوقك

Sherif said...

الشاب الوسيم

جميلة جدا جنية فى بحركم .. يعنى مش احنا بس

مرحبا

Sherif said...

Appy

اتمنى ان تعود الكتب تفتح نفس الاولاد

حاسس ان السوق بقى كله حفظ .. ودروس بتستنزف الناس وخلاص

أهلا بك دائما

Desert cat said...

اجمل حاجه انه نفذ اللى فى دماغه مهما كان الموضوع بعيد كل البعد عن اللى هو عايزه لكنه جعله طواعيه
وانزل الطائرة فى السوق
تحياتى

Sherif said...

Desert Cat

كنت متأكد انه هايعجبك تصرفه لأنك عندك دايما قوة الشكيمة دى

مرحبا

blackcairorose said...

بواب تانى دور!!!!

طبعا فضلت لفترة طويلة بفتكرها كده انا كمان بس مكنتش اعرف ان الغلطة دى شائعة كده!!

اختى الصغيرة فى امتحان اللغة العربية فى ايتدائى كان فيه جملة

منزل تحفه الاشجار

وكان المطلوب مرادف لكلمة "تحفه"

اختى لم تعرف الاجابة ولكن المراقب كثر خيره غششها الاجابة، لكن قالها ايه؟

تحفه = روعة

والله مش بهزر

فضلنا بعد كده لسنين كل ما نعوز نقول على حاجه حلوة قوى نقولها تحفة ولكن ننطقها مثل الفعل من باب التريقة طبعا

قلب صغير said...

ههههههههههههههه
علي فكره
الولد بتاع السوق عبقري
انا لو مكانه مش حكتب حاجه صالا
لكن هو عنده مبدا
بمناسبه سمع الاغاني غلط ياشريف
انت صاحبك سمع غلط وهو صغير
نهي صاحبتي
سمعت اغنيه جورج وصوف
ولا بقالك فاجاه ضهير
ولا بقالك فجاه دبابير
وهي كبيره كده
ولحد دلوقتي
محدش عارف يغير وجهة نظرها
اما انا فكنت بسمع اغيه انا بعشق الكحل
انا بعشق البحر
وقول هو منير متخلف يعشق البحر اللي كحل عيونك
يمكن حط كحل ازرق
مش مثلا اقول انا غلط
لالالالالالالالالالالالالالالالالالالالالالالالا
منير غلطان

Sherif said...

BCR

الحمد لله .. يعنى مش لوحدى كان بيسمعها بواب تانى دور ..

دايما تنورينى

Sherif said...

قلب صغير

على فكرة .. ساعات باحس ان المغنيين ممكن ينطقوا الكلمات غلط

مش معقول كل اللى فوق دول بما فيهم العبد لله بيسمعوا غلط

Che_wildwing said...

أول زيارة لمدونتك ولن تكون الأخيرة
تحياتى

Sherif said...

Che عزيزى

يشرفنى مرورك

مياسي said...

هاد الولد فتح و حدق و ماشالله عليه
عرف يدبر حالو رسمي هههههه

بالنسبه لموضوع الاغاني

انا اغنية سميره سعيد " قال جاني بعد يومين" من كم سنه بس اكتشفت انو انا كنت فاهمه نص الكلمات غلط

معك حق والله يا شريف هم المغنيين بفهموش نص الحكي

انا لحد هلأ بكتشف انو سامعه اشيا غلط كتير دايمن عندي مشكله في الكلمات

Sherif said...

مياسى

استطعت أن أضع يدى على السبب

.. معظم المدونين .. ثقافتهم انجليزية

shahy said...

انا جيت اهو يافندم علشان ازور مدونة حضرتك

المدونة اكثر من رائعة ـ والله بدون مجاملة ـ انا قريت معظم البوستات ولسة هاكمل الباقي ان شاء الله

حقيقي انا سعيدة بتجولي داخل مدونتك
وسعيدة اكتر بمعرفتها ومعرفة حضرتك
ولو تسمح عندي سؤال صغير
هو لية حضرتك بتكتب عنوان الموضوع في اخر البوست؟
ليا ان شاء الله تعليق تاني بعد لما اكمل القراءة بس مش النهاردة لاني عندي كتب كتاب اخو زوجي عقبال اولادك

تحياتي

Sherif said...

Shahy

يعنى لو قلت نورتينى تبقى كلمة قليلة

شرف لى انها عجبتك وقبل ماأنسى

ألف مبروك للأسرة كلها وربنا يجعل أيامكم كلها أفراح وسعادة

إجابة السؤال هى إنى باحب كل واحد يقرا وهو متحرر من أى شئ .. مش متأثر حتى بعنوان .. يعنى زى ماخياله يتصور

"يعنى لو قلت " بائعة الخبز
كل واحد هايقعد يدور على رغيف العيش خصوصا الأيام دى

وبعدين العنوان ده اقتراح .. ممكن مايكونش مضبوط قوى

شرفتينى بزيارتك

كاميليا said...

على أن ارحل
.....


أنا مش موافقة



:(


تحياتى

Sherif said...

كامى

يبدو أنه حصل سوء تفاهم

"فحينما قلت "على أن أرحل

كنت أقصد الاستئذان من مدونتك من كثرة ماتأسرنى قصص الماضى خصوصاً كلماتك فى البوست الأخير

متخافيش .. قاعد قاعد الى أن يشاء الله .. اذا كنا نعتقد اننا نملك اقدارنا فهذا غير صحيح

لازلت فى انتظار أن أرى حقيقة نفسى فى المرآة ..ماذا أنا فى عيون الآخرين

وأنت وعدتى

دمت لى بكل الاعتزاز

klmat said...

عزبزى شريف
ضحكتنى وكنت محتاجه حاجه دمها خفيف كده
عارف حدثت مع زميله لى كان موضوع الانشاء عن السد العالى وكانت مش عارفه تكتب حاجه لقله
المعلومات عندها فكتبت اغنيه عبد الحليم كنا حانبنى وادى احنا بنينا السد العالى
ولما قالت كده لوالدها اخذت علقه محترمه
اما انا فكنت اسمع اغنيه عبد الحليم وحياه قلبى وافراحه وهنا ايسا صاحوا
وكنت مش عارفه ايه معناها لحد ما سمعتها من واحده صحبتى واستغربت من نفسى ازاى بسمعها كده
بوست جميل تسلم ايدك

Sherif said...

كلمات

ربنا يضحكك كمان وكمان

قلتى ايه ؟ وهناه ايسا صاحوا ؟

نورتينى

أسوور said...

قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو ترك اللينك الخاص بالبوست والمعلومات الخاصة بالمدون فى تعليق على العنوان التالى

www.amyasser.blogspot.com

تحت عنوان خاص لجريدة الأسرة العربية
الجريدة تصدر الإثنين من كل أسبوع

مـ~ـاجدولين said...

ههههههههههههههههه

حادث عسول

يخرب بيت التعبير والتعليم التلقيني

Sherif said...

ماجدولين

الحمد لله .. رحتى وماقلتيش عدولى

weswes said...

بوست تحفه بجد
:)
تحياتى

طارق الغنام said...

اخى
بوست رائع
يعكس ماوصل لة التعليم فى مصر
تقبل تحياتى
واتمنى زيارتك لمدونتى النتواضعة
ودمت بحفظ الله

Sherif said...

عزيزى طارق

شرفنى مرورك بمدونتى

إيهاب رضوان said...

وكمان دمك خفيف ؟ ده انت حكاية كبيرة بقى
عفوا للتبسط فى الحديث لكنك أضحكتنى من القلب ، جعل الله أيامك كلها بهجة فى زمن تسربت فيه البهجة من حنايانا واستبدت بنا العتمة ولكن ستظل كلمات مثل كلماتك طاقات تفيض نورا
وشموعا تضئ دوما بالأمل
تحياتى سيدى الكريم