Sunday, July 27, 2008

حينما عدنا من استراليا كان الوضع كالاتى
أنا لاأعمل .. ومحال على المعاش .. أتقاضى حوالى مائتين جنيه .. وابحث عن شغل
زوجتى كانت قد استقالت من الجامعة وفى محاولات لسحب الاستقالة .. وتبحث عن شغل
IGCE بنتان فى ثانوى .. بمدرسة سانت فاتيما .. بال
لدينا سيارة 127 عمرها 18 سنة
ولدينا أيضا أم أحمد

أم أحمد هى ربة البيت الحقيقية التى تقوم بكل شئ .. فهى المسئولة عن المنزل من تنظيف وترتيب وغسيل .. وهى التى كانت فى عزها تعمل بقصور الأمراء بالسعودية على حد قولها .. الا ان النمكية التى تعمل بها والطلبات ولوازم تنظيف كل شئ من نجف وزجاج وأبواب وأحواض وأثاث الى آخر القائمة ينم الى حدّ كبير على صدق ماتقول .. فكأننا نعمل لديها ولاتعمل لدينا .. هاتوا لى ده .. قولوا للبقال يشوف سلك ناعم ماعرفش ايه ..

نستطيع أيضا أن نترك لها المنزل كله ولانغادره فقط .. ولكن نسافر .. ونعود بعد يومين أو ثلاثة .. مع توصية بسيطة بوضع سماعة التليفون جيدا وسك الباب والتأكد من ذلك قبل المغادرة .. منتهى الأمانة النادرة الغير متوافرة بسهولة فى هذه الايام

البيت بعدها للحق .. يشفّ ويرفّ كما يقولون .. لاغبار فى أى مكان ظاهر أو خفى .. والأحوا ض تخشى الاقتراب منها حتى لايذهب لمعانها .. وهذا لأنها تدعكه بالبب .. وقد طلبت منى أن احضر لها اياه وانا نازل اشترى بعض لوازمى .. فذهبت الى البقال
عاوز بب .. -
من فضلك عاوز بب .. -
بب ؟ -
آه .. عمرك ماسمعت عن بب ؟ -
مافيش حاجة اسمها بب .. -
ازاى .. اللى بيغسلوا بيه الاحواض .. -
أيوه يابيه .. فيم .. اسمه فيم .. -
(محمر خجلا ) .. أيوه هو ده (ثم لنفسى .. بس هى قالت لى بب .. انا متأكد ..) -

الاولاد بدأوا الدراسة .. ورحلة البحث عن أى وظيفة والدنيا التى تغيرت معالمها كثيرا كانت أكثر من شاقة .. ملأوها الإحباط المختلط بالدموع .. مع الاستعداد للعودة اذا تأزمت الأمور .. والدعوات المستمرة من أم أحمد أن نبقى فى مصر .. ويفتحها فى وشنا
كان ظنى أن كل واحد يغنى على ليلاه .. واللى ايده فى المية مش زى اللى ايده فى النار ..
بيت واولاد واحتياجات ودنيا دائرة مع ضيق ذات اليد .. لأ .. ولازم آى جى يابابا .. ماله التعليم التجريبى والا النموذجى ؟ ولاحتى اللغات ؟ ربنا هايفرجها .. بس انتوا ماتسكتوش .. هتلاقوا .. وكنا ننظر الى هذه الست بذهول ..
واخيرا عثرت زوجتى على عمل فى وزارة السكان .. مع الاستمرار فى الضغط للعودة الى السلك الجامعى .. وكل يومين تلاتة يأتى لئيم لنزع وسرقة فوانيس ال 127 الامامية .. فهى سهلة بضربة مفك .. مع انها دائما راكنة بالضبط بجوار العسكرى الواقف على باب الوزارة .. ما اضطرنى معه لصنع شاسيه مخصوص يثبتها من الداخل فلا يفلح نزعها

هذه البداية كانت أول الغيث .. ثم عملت أنا .. ومرت السنون .. وعادت زوجتى الى الجامعة .. وصار كل شئ بفضل الله وحمده عظيما .. ولاتزال معنا أم أحمد .. وطوال تلك السنين كان كل شئ فى أم أحمد هذه رائعاً .. إلا شئ واحد .. حبها الشديد لدفس كل شئ فى أى مكان غير ظاهر لايعرفه غيرها

وفى كل مرة .. كان علينا أن نحل هذه الالغاز .. فلا أجد نظارتى .. ثم أعثر عليها فى الأجزخانة بالحمام .. ولاأجد الورنيش .. ثم أكتشف انه فى آخر درج من أدراج المطبخ وهكذا
ولامانع من وجود تى شيرتات اولادى فى درج ملابسى .. أو بنطلوناتى فى دولاب زوجتى .. أما الشباشب فتلك قصة أخرى .. وأخيرا مع الخبرة وبعد جهد ومحاولات عديدة الأسهل منها العثور على بن لادن شخصيا .. فهمت انها مدفوسة بين شنط السفر تحت السرير وملة السرير نفسها .. وذلك بعد تعبئة كل فردة فى كيس نايلون بعناية تامة للمحافظة عليها .. وكثيرا ماكنت البس فرد من شباشب متنوعة .. والفردتين شمال اذا كان الوقت لايسعفنى

وهكذا قبل مغادرتها المنزل والقاؤها السؤال التقليدى .. عايزين حاجة قبل مانزل تنهال عليها الاسئلة .. فين الكوتشى اللبنى ياام أحمد .. فين الكتاب اللى كان عالسفرة يا ام أحمد وهكذا

كبرت أم أحمد .. وضعف نظرها .. واصبحت الأشياء تقع من يدها كثيرا .. والأوانى والاكواب تنكسر .. وكذلك كريستال النجف .. ويصعب عليها كثيرا اذا حاولنا الاستعانة بأحد عفىّ قليلا ليساعدها .. ربما خوفا على أكل عيشها أيضا ..

يقولون لى أن أم أحمد كبرت .. ولابد أن تستريح .. وأقول أنا .. شوفوا بقى .. الست دى شالتنا وهى عفية .. مش هانشيلها لما كبرت ؟ .. الست دى كانت قدم خير علينا .. وكفاية دعواتها لينا كلنا .. احنا مش بنبيع ناسنا بأى تمن .. خلوا بالكم ..كلنا هانكبر فى يوم
&
&

لماذا لاننتبه ليوم يأتى علينا ؟

53 comments:

نعكشة said...

هيا قصة ولا حقيقة؟؟؟؟؟؟؟؟؟؟


جميلة قوي

لو قصة روعة لإني حسيت انها حقيقة
و لو حقيقة ماشاء الله انت انسان نبيل جداً

مش عارفة اقولك اية

صراحة قصة او حقيقة روعة

دمت سالم
سلامٌ عليك

نعكشة said...

قريت باقي المواضييع و اكتشفت انها حقيقة

ربنا يكرمك يا رب
حضرتك بجد انسان نبيل
بس سؤال رخم

هتعملو إية مع ام احمد
هتجيبو حد يساعدها :D

حشرية أنا

.............

دمت سالم

سلامٌ عليك

نعكشة said...

معلش رخامة تاني

اسلوب حضرتك في السرد رائع

بس خلاص آخر مرة هعلق في الموروضع دة

بس بجد اسلوب حضرتك في السرد حلو قوي

مفكرتش تكتب قصص؟؟؟

انتي مالك يا حشرية انتي

خلاص سوري سوري

سلام عليكم

shasha said...

اكيد صعب موضوع انك تتخلى عنها وده ابسط حقوقها عليكم وموضوع الحاجة مش فى مكانها اعتقد ان كلهم بيعلموا كده مش هى بس تحياتى بوست رائع

قوس قزح said...

صعب عليها فى السن ده انها تشتغل شغلانة زى دى
اعتقد انها تستحق الراحة
و ايضا تستحق معاش على خدمتها لكم

ربنا بيبعت رزقها من خلالك فلا تقطعه تماما
لانه قد يكون ببساطة سبب فى ابواب رزق اخر لك
انا متاكدة انك هتوصل لقرار حكيم

تحياتى و سلامى لام احمد

karim said...

ربنا يخليها ليكم و تعدلكو و تدعلنا و يخليكم ليها تقوها على الحيااة

Sherif said...

عزيزتى نعكشة

حضورك كله حيوية وبهجة

معا حتى النهاية .. أم أحمد معنا الى أن يشاء الله .. ليست هى فقط .. وغيرها أيضا .ز واعتقد أن من فى مكانى لن يفعل أقل من ذلك وفاءا وعرفانا

نورتينى بتشريفك

كاميليا said...

الله

انا باجى هنا باحس بدفا العيلة
كل حاجة بتحكى عليها بيكون عندى منها حتة .. انا كمان كان عندى أم أحمد
كنت بحبها اوى اوى

....
احنا مش بنبيع ناسنا بأى تمن .. خلوا بالكم ..كلنا هانكبر فى يوم
....

جميلة اوى الجملة دى

دمت بكل الخير

تحياتى

appy said...

عامله زى بوبا
الداد بتاعت طنط اللى هى خالتى اللى انا بنادى لها باسمها
ههههههههههه

وبما انى متربيه مع طنط فكنت دايما فى مشاكل مع بوبا الدادا بسبب انها بتخبى الحاجات عنى ومش باعرف مكانها كمان غير لما هى تقولى وتبقى ماسكه امور البيت كلها

بس لما كبرت خالتى سابتها فى اوضه عندها وجابت بنت تانيه وهى راعتها لغايه لما ماتت ربنا يرحمها

Sherif said...

عزيزتى نعكشة الكميلة

البيت بيتك ومطرحك .. وأهلا بيكى فى كل وقت .. وبأى طريقة

هذه المدونة ليست أكثر من سرد مستمر للقطات حقيقية من حياتى .. قهى ليست قصصا .. وإن أوحى أسلوبها بذلك

معا حتى النهاية " .. هكذا قررنا "
بالفعل فاستعنا بمن يساعد .. وتحت اشرافها الشخصى .. وهكذا حلينا معادلة هامة

أولا الحفاظ على سلامها النفسى
ثانيا تدريب عناصر جديدة على صنعة اتقانها أصبح نادرا .. وعلى يد محترف .. وقبل ذلك على القيم والأمانة التى تجعل الناس تشتريك بعيونهم

يسعدنى تعليقك وروحك الخفيفة

Sherif said...

shasha عزيزتى

على فكرة .. الموضوع أصعب بكتير من الطرح الادبى الرشيق

ساعات ممكن ماتتحمليش .. خصوصا لو كنت مستعجلة

مرحبا بك

Sherif said...

Rainbow

لاتقلقى ياعزيزتى .. فمن يعى جيدا درس أن الدور عليه .. وهو قادم لامحالة يجعلك تستنجين ببساطة كيف يكون قرارنا

هو كما قلت .. رزق الناس من رزقك

يعجبنى رأيك

Sherif said...

Karim

يارب .. آمين

Sherif said...

كاميليا

أنا لاأباريك فى رقتك وشاعريتك

ولايمكن أن يؤثر فيك هذا مالم تكونى أكثر رهافة .. وأكثر حنوا

دمت لى بكل ود

Sherif said...

Appy

يعن اذا كان الواحد بيتعلق بحاجة بسيطة لمجرد أنها بتاعته .. مابالك بالناس؟

هل هذا عيب فينا نحن المصريون .. أم أنه أعظم مافينا؟

نحن ليس لدينا نظام تأمين اجتماعى .. ولاصحى .. فكيف يعيش الشرفاءان لم يكن بكل هذا الحب والتماسك؟

مرحبا بك فى كل وقت

زمان الوصل said...

جميله ..
إنسانه جميله
و حكايه جميله

معلش مش هاقول "امرأه من الزمن الجميل" عشان موضوع الزمن الجميل ده بيعفرتنى

بس إنسانه جميله كده تستحق إيه أقلّ من أسره جميله زيّكم تعتبرها فرد أصيل منها !! دى حتى تبقى نهايه لا تتسّق مع كل هذا الجمال
:)

صباح الخير يا مصر said...

شريف باشا
*********
أنما يعرف الفضل أهل الفضل...و يعرف الوفاء أهل الوفاء

تحياتى يا فندم

Sherif said...

زمان الوصل

هى فعلا جميلة .. بقلبها الناصع .. ودعائها الذى تنفتح له ابواب السماء

نورتينى بزيارتك

Sherif said...

صباح الخير يامصر

هذا فقط من ذوقك الرفيع

عدى النهار said...

ضرورى أوي إن الواحد يتعرف على المواقف الجميلة دي اللي بتأكد إن الدنيا لسّه بخير

Sherif said...

عدى النهار

أهل الخير أنت من بينهم بالتأكيد

دمت لى صديقا

Desert cat said...

الناس الكبيرة بيكون فيها الخير باقى ودعواتهم كلها بركة
وانا بحب دعواتهم جدا
ربنا يدى ام احمد الصحة
تحياتى

Shimaa Gamal said...

الأمانة عملة نادرة فى زماننا ده . كان فى واحدة بتساعدنى تسرق الكحل من العين . كنت مستحملاها لإن مافيش غيرها و كنت لسه صغيرة فى المدرسة و الجامعة بعدين ربنا رزقنى بواحدة تانية ، أكبر فى السن و نظرها ضعيف لكن الأمانة عندها أعلى . على الرغم من إنى ممكن أقوم بشغل البيت لكن شايفة إن الأحسن أنا و هى نساعد بعض . هى تخفى الحاجة و أنا ألاقيها و أنا أنضف اللى هى مش بتشوفه . بس أنا بحبها جداً و مقدرش أعيش من غيرها أبدًا ربنا يخليلكوا أم أحمد

Sherif said...

Desert Cat

شعورك الجميل هو الذى يستحق التحية

Sherif said...

shimaa

وربنا يخليها ليكى

قلب ينبض لله said...

أم أحمد

يابختها أنها عرفت ناس زيكوا

فضلت مشدودة لآخر البوست اشوف هاتعملوا معاها ايه

نبل أخلاق مفيش كلام

Sherif said...

قلب ينبض الى الله

لايشعر بالخير الا أهل الخير مثلك

insomniac said...

i love om ahmad and all om ahmad's really... la2en mesh betla2y nas feehom el teeba de keteer!

rabena yeshfeeha we yedeeha el se7a :)

i think you should get someone on weekends yenaddaf while she's not there, aw whatever time she's not there 3ashan heya mesh tedaye2, we bardo mesh tet3ab when she's there... ma3rafsh, i would do something like that... i would be afraid to ask her to stay home and pay her because it could be offensive to her and because i would miss her presence really... mesh 3arfa ba2a, ya rab rabena yelhemko be 7al :)

nice post :)

Sherif said...

Dearest insomniac

It's been long since last time ..

rest assured we were able to have a helper that works under her supervision ..

Experience is important .. that's wasn't any offensive and everything is going fine el7amd lellah ..

please don't hide again :)))

بنت القمر said...

بب!!!:))))))))))
حتي مش عارفين انه فيم وليمو ونستابون وجلانس وكلوركس وفانيش وفنيك
لا طبعا لازم تقعد وتدوها معاش كمان ومكافأه نهايه خدمه
ربنا يكرمك لكرمك ليها

Sherif said...

عزيزتى بنت القمر

آه بب .. عمرك ماسمعت عن بب؟

لاتتخيلى قد ايه بابقى سعيد بزيارتك

نورتينى

sa7arkash said...

الله عليك
بجد الله عليك..على قصة الكفاح والمشوار الجميل..وعلى العظيمة ام احمد ..جعل الله ذلك فى ميزان حسناتك

وعلى فكرة احنا كان عندنا ام احمد برضة...بجد والله مش هزار ..بس هى اللى لما تعبت رفضت البقاء..مع عرضنا عليها بمجرد التواجد معنا وسنكفل لها من يخدمنا ويخدمها..ولكنها رفضت وآثرت البقاء وحدها رغم انها ليس لها اولاد..ولكننا نودها دوما ونحاول رعايتها..رغم انها تركت بيت العائلة منذ اكترمن 20 سنة!!!!!!!تصدق


ربنا يديهم الصحة جميعا ..

Sherif said...

sa7arkash

يبقى ألله عليكم انتوا كمان .. لايقدر الخير الا أهل الخير وأنت منهم طبعا .. اتمنى ماحدش يطلع معاش الا بارادته طالما يقد يدى ولو خبرة

بس دى هاتزود مشكلة البطالة للأسف

كلامك دايما جميل

مياسي said...

الوفاء خصلة جميلة قل أن نجدها في هذا الزمن

معظم الستات الكبار فيهم عادة "التخبايه" دايمن الشي مدفوس ع قولتك في مكان ما مش معروف وين

بس خطر في بالي انها ممكن تكون بتخبي متعمده حتى ما تستغنو عنها

ممكن؟؟ ممكن ليش لأ؟

تحياتي لصاحب الذكريات الجميله دوما

Sherif said...

مياسى

والله جائز أن مسألة الدفس تكون متعمدة

بس هى طيبة جدا .. وهو ده تصورها للنظام

نورتينى

weswes said...

سرد حضرتك كل مره بيبقى احلى من اللى قبليها بجد رائع

تحياتى

سمراء said...

الناس اللي زي ام احمد بيبقوا افراد في العليلة
وزي ما بتقول في يوم كلنا هنكبر وهنحب نلاقي ناس تساعدنا وتراعينا

عموما اللي يفكر زيك كدة اصييييييييييييل

سمراء

Sherif said...

عزيزتى سمراء

الأصيل الحقيقى هو من يستشعر الأصالة .. وانت منهم برقى أخلاقك ورهافة حسك

مرحبا

Sherif said...

weswes عزيزتى

أنت الأجمل .. أشكرك على تلك الشهادة التى أعتز بها

Arabic ID said...

شريف الرائع
--------

التربية كلها فى السطور الأخيرة من البوست، هى تكفى لزراعة موقف لا ينسى وقرار به كل العرفان للجميل والعشرة
تحياتى لك وربنا يكرمك فى أولادك وأحفادك وتقر عينا بهم

==========
تحياتى لك شريف

Sherif said...

الشاب الوسيم

حينما تشرفنى بحضورك أحس ببعض الشخصيات التى هى فوق مستوى البشر

ربما أحدى الشخصيات التى أحبها كثيرا لكنها أشبه بالأساطير

أتذكر معها أغنية مدحت صالح التى فازت بمهرجان البحر المتوسط باليونان منذ سنوات

رافضك يازمانى .. يا مكانى .. يا أوانى
أنا عايز أعيش فى كوكب تانى

غر أن هذا الكوكب غير موجود .. فهؤلاء مضطرون للعيش على الأرض

سلوى said...

أولا شكرا ع الكلام الجميل في الشات بوكس وفعلا أنا بتعلم منك

أعلق الوقت براحتى بقى :)

طبعا اللي يتابع مدونتك
يعرف إن تصرفك عادي جدا
وهو المنتظر منك :)

سردك وتأملك لما مر بك في الحياه
يعني أنك تعلمت من كل شئ مر بك

بارك الله فيك
وأعانك دوما على فعل الخير

دمت بكل الخير :)

Sherif said...

Salwa

حقيقة أحتاج لاصحاب المشاعر الرقيقة وربما الحس المرهف لأن يكونوا ضيوفى على الدوام.. كما أحب أن أزورهم ..وبالتأكيد انت من بينهم

لا أزال أذكر كلمتك الشهيرة .. حين رأيت هذه الصورة ابتسمت .. حين قرأت هذا البوست .. ابتسمت

وهكذا علقت صورتك فى ذهنى بوجه جميل مبتسم .. ربنا يسعدك على طول يارب

ولاأجامل إن قلت أنه هذا هو العالم الذى أحيا به وأعيش فيه .. بل يعيش فى فى الواقع لأنى أذهب به الى أى مكان

الباقة كبيرة .. وهى ليست فقط المذكورين فى القائمة .. فبقيتهم على ال favorites

أسعدتينى بما كتبت عندك .. وتكفينى زيارتك .. حتى بدون تعليق

سلوى said...

:)

tulip_rose said...

لماذا لا ننتبه ليوم ياتي علينا ؟
الحقيقة قرات الامس كلماتك وسردك الرائع لبعض احداث حياتك ولم اعلق ثم اتيت ثانية اليوم ولم اعلق ثم ها انا ذا هنا لاشكرك ثلاثا اولا لانك تسرد ما يثري الفكر وليس مجرد حديث عابر عن حياة شخصية
ثانيا لان اسلوبك في السرد يجبر الجميع علي الاحترام والتعقل والتفكر في كل كبيرة وصغيرة مع الحفاظ علي الروح الخفيفة والابتسامة في مواضع عديدة خلال الاحداث
ثالثا انك بالفعل اخ كبير فكل من علمني هو كبير فعلا فالكبر ليس بالعمر بل بالافعال
الاخ شريف ادام الله عليك نعمته التي حباك بها ووفقك لما يحب ويرضى
تحياتي

Sherif said...

tulip rose

يشرفنى حضورك .. والأكثر إطرائك الرقيق .. وقد زرت مدونتك .. ففهمت أنك من الذين يكتبون باحاسيسهم .. ربما هذا مافسر حيرتك

مرحبا بك فى كل وقت

someone in life said...

شريف

بوست جميل الاعتراف بهؤلاء البسطاء المعدمين و تقبل افعالهم البسيطة العفويه بصدر رحب تجعلهم فعلا سعداء هي حاسه ان ده بيتها و انتم عيلتها ادام الله لك الرزق و لا تنسي الدعاء لها دائما

تحياتي

Sherif said...

someone in life

يؤثرنى دائما رأيك الذى يتميز بانسانية عالية .. واحساس عميق بطبائع الأمور

إيهاب رضوان said...

المرة الأولى التى أدلف فيها لمدونتك شديدة الجمال التى تحتاج وقتا طويلا للتصفح ، لكننى قرأت مبدئيا أم أحمد والبوست الأول فشممت تلك الرائحة المميزة للصدق ولمست بساطة وتلقائية كلماتك شغاف القلب بحق ، سيدى قلما يشدنى قلم كقلمك رغم بساطته فأنا قاص عاشق للكلمة الرشيقة الساحرة .. لا أود الإطالة لكننى أعد بالمتابعة ويسعدنى تشريفك مدونتى المتواضعة دخل الشتا .

و القادم....أجمل said...

الله
ما شاء الله
ربنا يكرم و يعزك
بجد حاجة جميلة اوووووووووي

:)

دمت بخير

Anonymous said...

أنا ماكس بس موش عارف ادخل من بلوجى لظروف الزهايمر .. ذكرتنى بأم جابر التى تبعتنا من العجمى لسموحة وكانت تفعل تماما كأم احمد بتاعتكم لكنها كانت تزيد بالعنف فى زق الكنب والكراسى وكسر الفازات أثناء التنفيض زعلت ام جابر مرة جدا لأن 75 جنيه سقطت من جيب أحد بنطلوناتى وهى تعلقه ... فامتنعت عن استكمال النظافة يومها وجلست فى انتظارنا قائلة : هو انتو بتعملولى امتحان والا إيه؟؟ ظنت أنه شرك لاختبار الأمانة ولم يكن كذلك ماتت ام جابر وهى واقفة على قدميها تعمل بشرف ,, رحم الله كل الأمهات العاملات بشرف وأمانة

Sherif said...

someone in life
===============
هذا لرقتك وذوقك
دمت بكل خير

ايهاب رضوان
===========
تأسرنى بكلماتك التى أنا أبسط منها .. والتى أسعدتنى كثيرا .. وأحسبنى محظوظا بتشريفك عندى

وبالتأكيد .. يشرفنى أيضا أن أزورك ..

أهلا بك فى كل وقت

والقادم أجمل
===========
أنت الأجمل سيدتى والأرق .. بدليل مدونتك

مرحبا بك

anonymous
=========
ماكس .. انت فين؟ وليه البلوج مش شغال ؟ لماذا توقفت ؟

على ما اذكر .. الميل كان

maxbta3zaman@yahoo

pass حاجة فيها نور ..اسم عريسنا

اللهم آمين

هل رأيت أنك تكمل ما أبدأ انا؟

هيا شمر الفتلة وافتح بلوجك المهجور

دمت بخير

Sherif said...

ايهاب رضوان
===========
وقلمك أيضا ياسيدى يزيد رشاقة عما أكتب أنا

نورتنى بزيارتك

والقادم أجمل
===========
تأسرينى سيدتى بذوقك واحساسك
شرفتينى

anonymous
=========
جميلة قصة أم جابر

اتعجب لماذا لايفصحون عن اسمائهم الحقيقية ؟ قبل ماتجيب جابر مثلا

أتذكر الميل
maxbta3zaman

Pass فيها نور اسم العريس

مرحبا