Friday, August 8, 2008

أنا محتاج تمانين جنيه .. مش عارف أدبرهم ازاى -
عاوز تعمل ايه؟ -
عاوز أدفع مقدم ثلاجة وبوتاجاز .. وأدفع قسط من -
مقدم الايجار
تمانين جنيه مبلغ مش صغير .. -
بافكر أعمل سلفة .. أو استبدال معاش .. -
أستبدال ؟ .. بدرى كده؟ -
فيه حلّ تانى ؟ -
فيه طبعا .. أنا لو مكانك مش ممكن اسلف أبدا -
المحتاج .. يعمل ايه ؟ -
فيه طرق تانية كتيرة .. -
ازاى يعنى ؟ -
بص .. تقابلنى النهاردة بعد الظهر ؟ عالساعة سابعة كده ؟ -
فين ؟ -
عالقهوة اللى قدام سينما الأهلى فى السيدة .. -
أشمعنى يعنى ؟ -
قابلنى وأنا هاوريك حاجات كتير .. -
ماشى .. -

كان هذا الحوار بينى وبين مراد .. وهو زميل مهندس جدع وابن بلد .. يكبرنى قليلا .. احبه واحترم .. وهو كذلك .. كان يتوسم فىّ شيئا ما .. وبالتأكيد غيّر رأيه بعد حين .. يتميز بالقدرة على التصرف .. وسرعة البديهة وهناك على القهوة .. تقابلنا .. وبدأ يعرفنى على الأصدقاء .. فلان .. مدير بنك (..) .. الاستاذ فلان .. رئيس ادارة ( .. ) بمصلحة الضرائب .. الحاج فلان .. تاجر خردة وقطع غيار سيارات .. الاستاذ علان .. تاجر سيارات جديدة ومستعملة .. والقائمة طويلة
تشرب زنجبيل ؟ -
أشمعنى زنجبيل ؟ -
كلنا هنا بنحب الزنجبيل .. -
أشرب زنجبيل .. مش بيجلى الصدر ؟ -
طبعا .. -
خلاص .. -

فى هذه الجلسة افتتح مراد القعدة بعشرة دومينو عادة .. مع اتنين تجار .. اتفق معهم على بيع سيارتين مستعملتين .. واحد فيات قردة 1100 والأخرى 2400 بولندى .. وفى الجلسة الثانية انتقلنا الى ترابيزة أخرى .. حيث زبون يرغب فى شراء عربة فيات قردة عملية بسيطة بيع وشراء وسمسرة .. تعمل حوالى ميت جنيه ..
فى اليوم التالى كانت جلسة جديدة .. وهذه المرة مع تاجر كيماويات وآخرين .. واشتركت فى اللعب .. كنت الاحظ فقط مايجرى .. وفى هذا الوقت بالذات كانت هناك أزمة فى الزنك .. سعره الرسمى حوالى 40 قرش للكيلو .. بينما فى السوق السوداء يبلغ 150 قرشا .. فهو شاحح وقليل جدا

على الجانب الآخر .. كان المصدر الوحيد لانتاجه هو شركة القاهرة للكيماويات . . ولأغراض البناء فقط .. حيث تمنح حصصه بتصديق معين لضمان عدالة التوزيع .. وبطريقة ما فهمنا أنهم يمنحون تصاديق للأفراد أيضا .. لكل فرد حصة هى عشرة كيلو لأغراض البياض المنزلى .. لكل من يريد أن يدهن شقته الخاصة .. يمنح لمرة واحد كل خمس سنوات

الطريقة .. طلب الى الشركة مشفوعاً بعنوان السكن وصورة عقد إيجار واقرار بانه لم يسبق الصرف .. وحلفان على المصحف بأنك مش هتاخد تانى

ومضت فكرة فى رأس مراد .. وعرضها على .. أعجبتنى
طيب لما هى عجبتك .. ساعدنى ؟ -
ازاى ؟ -
نخلى أكبر عدد ممكن يمضى الطلب .. -
وهاجمع الأوراق كلها .. الطلبات وصور عقود الايجار والاقرارات -
وليك ياسيدى 10عشرة فى المائة -
نعم ؟ -
ماتزعلش .. عشرين -
خمسين .. -
أنا اللى .. -
حلال عليك .. -
خلاص .. موافق .. -

كان عندنا اثناعشر موظفا بالمصلحة .. من أول مدير حتى آخر موظف .. وكلهم لاحاجة لهم فى هذا الزنك .. وكل واحد له عشرة كيلوجرامات زنك .. يعنى 120 كيلو زنك .. يأخذه التاجر بسعر 120 قرشا للكيلو ليبيعه ب 150 فى السوق .. الحسبة كلها تعمل حوالى 96 جنيها

وعلى مدى اسبوعين ظل الموظفون فى المصلحة يسدون الى تلك الخدمة .. فأنا الذى احتاج الى هذا الزنك لتجهيز شقتى وأنا على مشارف الزواج .. حتى اكتملت الاوراق .. فأعطيتها الى مراد الذى تقد بطلب مجمع كمندوب عن المصلحة .. الى شركة الكيماويات .. ودفع قيمتها

لم يكن أحد يعرف بتلك الأزمة .. بل أن أحدا لم يهتم بهذا الموضوع أصلا .. لأنه لايحتاج الى زنك فى ذلك الوقت .. فلا أحد ينوى اعادة دهان شقته أو تجديدها .. كلهم ماصدق أن قام البيت على حيله وكفى الله المؤمنين القتال

وفى أمسية .. على نفس القهوة .. باع مراد التصديق فقط الى تاجر الكيماويات .. الذى باعه قبل أن نغادر القهوة الى آخر ليتسلم
الحصة من المنفذ المعتمد .. وهكذا .. حصل مراد على أجر السمسرة بين طرفين .. وحصلت على نصيبى الذى قرّبنى كثيرا مما احتاجه

لكننى أعترف بأننى لست من هذه النماذج من البشر .. والتى تتميز بأنف دقيق يشتمّ رائحة المحتاج عن بعد .. وكذلك رائحة النبع الذى يروى هذا المحتاج


&
عشرة كيلو زنك ..

34 comments:

رحــــيـل said...

استاذ شريف اخبار حضرتك ايه

اما انا فاحسد هذا النوع لما له من خبره فى التعامل فهو يعرف دائما كيف يتصرف وما ينبغى عليه فعله فى شتى المواقف

التجاره شطاره
واهى تجربه واكيد اتعلمت منها

واستمتعنا احنا كالعاده بذكريات حضرتك

تحياتى وتقديرى

Sherif said...

رحيل العزيزة

على فكرة .. لسة كنت عندك .. وبقدر سعادتى بحضورك .. بقدر قلقى عليكى هناك ..

يارب يبعد عنك كل سوء .. ويكتب لك فى كل خطوة سلامة .. وسعادة

كاميليا said...

طيب هو الزنجبيل كان طعمه حلو؟

:D

....
كان يتوسم فىّ شيئا ما وبالتأكيد غيّر رأيه بعد حين
....

واضح ان حضرتك اللى غيرت رأيك

سعيدة كعادتك لسماع حكايتك الجميلة
اول ما اشوف انك نزلت بوست جديد فى الريدر
اجى جرررررى .. علشان استمتع بما تكتب

ربنا يحفظك يارب


تحياتى واحترامى

صباح الخير يا مصر said...

Sherif
*******
نعم هناك دائما من يجيدون استغلال العلاقات و استغلال الاحداث الجاريه والاستفاده منها لصالحهم.....ليس بالضروره ان يكونوا اناس سيئين
... ...
فهم ذوى صفات و ملكات خاصه...و فى النهايه هى الارزاق تأتى من عند الله

تحياتى

youma said...

بما انه في زيادة في السعر وفي فرق وفي استغلال واضح يبقى الموضوع مش مريح

بص انت ترجع الفلوس احسنلك

وكفا الله المؤمنين شر القتال

بهزر
انت تعمل لي عايزه
براحتك خالص

بس برضه
استغلال
:P

appy said...

برجع معاك لزمن بعيد بس بحس ان الزمن ده برضه حتى لو فيه سلبيات افضل من زمنا كتير اوى

blackcairorose said...

أهلا شريف
كيف اخبارك ان شاء الله تكون كل امورك بالف خير

أنا القى التحية على كل الاصدقاء بعد عودتى، فلك منى أيضا خالص التحية والود

قرأت الان موضوعاتك وحقيقى اريد التعليق على اشياء كثيرة ولكن الملحوظة السريعة التى اثارت انتباهى انك فى تدوينتك السابقة نشرت صورتك ولكن يبدو أن الجميع ظن أنها صورة ارشيفية من النت حتى جاءت مياسى وسألتك ما اذا كانت صورتك الحقيقية وأنت اجبتها بنعم

على عكس بقية الاصدقاء فان الصورة هى اول ما لفتت نظرى حين مررت سريعا على المدونة قبل عدة أيام وأنا فى الاجازة، وقررت أننى سأسالك عنها مع أول تعليق بعد عودتى لكن مياسى سبقت!!

يمكن استشفاف الشبه مع صورتك وأنت طفل، ربما فقط الشعر الاشقر صار أكثر غمقا كالعادة مع الكبر فى السن و الصورة توحى بالجدية والاجتهاد فى ملامح صاحبها وأيضا بالتأكيد الطيبة

أعرف أن تعليق من يقرأ الان ما أكتبه سيقول:

وهل أتت بجديد؟؟!!

Desert cat said...

مش مستغربة من شخصية مراد
بالعكس شايفه انه مجتهد وبيعرف يتصرف بطريقة حلال ومش توقعه فى مشاكل
تحياتى لحضرتك

Shimaa Gamal said...

المهم ، مناخيره اللى بتلقط كل حاجة وصلته لفين ؟ مجرد فضول

Sherif said...

كاميليا
=======
الزنجبيل شربته مضطرا .. ولاأزال لأقاوم به البرد

مراد كان فاهم انى ممكن ابقى زيه .. بس على مين

تنورينى بحضورك


صباح الخير يامصر
==============
لها ناسها ياعزيزى .. وكما قلت ..الأرزاق بيد الله

مرحبا

youma
=====
والله أنا أعرف ان ده اسمه سعى .. وفى بلاد أخرى اسمه دلالة
فقط عندنا اسمه سمسرة وهو اسم غير لطيف على الاطلاق

احببت أن أقدم نماذج تستطيع أن تصنع فلوسا ..ولاتستدين

آبى العزيزة
==========
على الأقل كان فيه مجهود يبذل .. يعنى واحد بيوفق راسين فى الحلال .. واحد عايز .. والتانى موافق

يسرنى حضورك دائما

BCR
====
حمدلله عالسلامة .. لأ .. غيبة طويلة قرأت مختصرها فى مدونتك

نعم ياسيدتى .. هذه صورتى وأنا صغير .. ولاأريد أن أصدم الأصدقاء بصورتى حديثا

لهذا أكتفى بهذا القدر الذى ذهب معظمه

حضورك يسعدنى دائما

Desert الغالية
==============
البعض يراها شيئا آخر كما تقرائين فى التعليقات السابقة

أنا شخصيا من رأيك ولاأرى غضاضة فى ذلك
أهلا بك فى مدونتك

shimaa
======
كما تتوقعين .. صاحب أملاك عقبال عندك

مرحبا بك دائما

Che_wildwing said...

تعود بي سطورك لزمن كنت أتمنى أن أحيا فيه
لأنى أثق أنه مهما كانت فيه من أخطاء فهو أفضل من القادم
وبكثير

Sherif said...

che العزيز

صدقنى .. الزمن الأنيق هو أجمل من الزمن الجميل

نورتنى

safaa said...

كلامك فكرنى بحاجات قديمه زمان كان ابويا بيعملها عشان يزود دخله ايام ما كان مدرس ماهيته اول ما اتعين 7.5
ولحد ما خلفنى مكنش بيقبض اكتر من 20 جنيه فى ازهى عصور مرتبات المعلمين
واشتغل كل اللى قولته دة وسمسرة العربيات و و و ياااااة بجد كلامك رجعنى لورا اوى
هههههه حرام عليك فكرتنى بالفقر غير السيرة دى بقى

walaa gobashy said...

واضح انك من الندرة في مجتمع للاسف سادت به هذه التسليكات
واللي مش يعمل كده في زمان والان مش يلاقي ياكل
انما اصحاب المبادئ يمكن يحيدوا عن الطريق مرة لاكن مستحيل يغيروا الطريق للابد
انا مع موقفك ويارب نلاقي كتييير من الناس بنفس الفكر ومش يغيروا طريقهم للابد عشان لقمة العيش
تحياتي لشخصك المحترم اخي
بارك الله لك واكرمك في ابنائك قرة عيونك

ولاء said...

واضح انك من الندرة في مجتمع للاسف سادت به هذه التسليكات
واللي مش يعمل كده في زمان والان مش يلاقي ياكل
انما اصحاب المبادئ يمكن يحيدوا عن الطريق مرة لاكن مستحيل يغيروا الطريق للابد
انا مع موقفك ويارب نلاقي كتييير من الناس بنفس الفكر ومش يغيروا طريقهم للابد عشان لقمة العيش
تحياتي لشخصك المحترم اخي
بارك الله لك واكرمك في ابنائك قرة عيونك

Sherif said...

safaa
=====
على الأقل هى محاولات لكسب الرزق فى وقت كان صعبا جدا

بابا معذور مثلى .. والبلد كانت فقيرة جدا .. غير اننى لم أكن أجيد تلك المواهب

نقول الحمدلله على نعمته الآن

نورتينى .. كما تنورينى دائما

ولاء
===
أشكرك على اطرائك الجميل الذى لااعتقد اننى استحقه .. فمثلى كثيرون ممن يكافحون .. ويكافئهم ربنا فى النهاية .. هكذا علمتنى الأيام

L.G. said...

تحياتي

قلب ينبض لله said...

أحلي مافي بوستاتك نهايتها
علي فكرة حضرتك مابتحكيش مواقف من حياتك كدا وخلاص دا كل موقف بتحكيه بيكون له هدف ومعني وقصة أنت بتلخصهالنا في كلمتين في آخر البوست

صاحب حضرتك دا كان ينفع رجل أعمال أنما أيه جامد جدا:D

Sherif said...

L.G.
====
أول مرة تشرفينى .. زرت مدونتك .. وهى تقول شيئا

نورتينى

قلب ينبض لله
==========
أشكرك من كل قلبى على اطرائك الرقيق

على فكرة .. مراد بنى بيت .. وعنده مكتب استشارات فخم ..

هو نموذج ناجح للاستفادة من فرصة متاحة .. بشكل عملى ..

مرحبا بك دائما

إيهاب رضوان said...

أستاذى العزيز
كالمعتاد البساطة الهادفة دوما هنا والذكريات الآسرة التى تشدك معها بعيدا لأيام خلت وأحداث ولت لكنها تركت القلب شغوفا بها لا يزال والعقل مفكرا فيها بتأمل .. تحياتى ويبدو أنك لم تقرأ تعليقاتى على بعض موضوعاتك القديمة .. ست الحزن لا تزال ترسل نداءها لك عبر الأثير .. شرييييييييييييييييف فتعال إليها فى دخل الشتا

بنت القمر said...

لاضرر ولا ضرار
افدت واستفدت ولم تأخزحق احد
بس البوتجاز ووالتلااااجه بتمانين جنيه
:)))
والله ايام يا عيني علي الجنيه بتاعنا مش بقا يجيب اي حاجه
تحياتي

مياسي said...

الناس اللي زي مراد بيذكروني بالناس اللي بيحكو عنهم هون بالأردن" بيستلمو 200 و بيعملو منهم 1000"

أنا فاهمه عليك جدا نقطة انو انت مش ممكن تصير زيهم؛ في ناس الهم طريقتهم ووسائلهم في جمع المال؛ ما بيغلبو أبدا

مش غلط برضو؛ زي هيك عالم بيفيدوك وقت الزنقه؛ و لو أنو في شغلتين نفسي أتعلمهم: أوفر مصاري؛ و أطلع مصاري زياده:)

على فكره؛ بالنسبة لتعليق روزا ع صورتك: أنا أول ما شفتها ما اجى ببالي غير انها صورتك الحقيقيه؛ ابدا ما فكرت انها صوره من النت: واضح انها حقيقيه جدا؛ سوري يا روزا لاني سبقتك:P

Sherif said...

العزيز ايهاب
============
تشرفنى دائما بزيارتك وكلماتك العميقة

بالتأكيد سأقرأ ست الحزن .. لأنها تعنى لك الكثير .. وسأعلق عليها ان شاء الله

العزيزة بنت القمر
=================
صحيح كانوا بتمانين جنيه .. بس ماحدش كان لاقيكم

دلوقتى أى ترابيزة فى مكان مش غالى .. بندفع فيه ماية جنيه .. مضبوط؟

دمت لى دائما

و القادم....أجمل said...

السلام عليكم

إزي صحة حضرتك ؟؟

فيه ناس عنده الموهبة دي
بعتبرها فن
و بتختلف من شخصية للتانية

الحمدلله أنا من التانية
:\

ربنا يوفق حضرتك و يعزك

الصراحه بستمتع جدا
بقراءة موضوعاتك

تقديري الشديد لك

:)

المهاجر الى الله said...

السلام عليكم ورحمة الله وبركاته
كيف حال الاخ الكريم شريف
اولا اشكرك كتير على زيارتك الكريمة لمدونة عيون واتمنى تكرار الزيارة ولقد سعدت بها
واحييك على مدونتك الرائعة واتمنى لك التوفيق

Arabic ID said...

شريف الرائع
لن أقول أنى لا أحب النقود أو أنى لا أعمل من أجلها
ولكن سأقول أنى باتكسف اتكلم فى الحكاية دى حتى لو تعبت فى مصلحة وأخدت وقت منى تلاقينى وقت الفلوس دى بابقى مكسوف وأرمى المطلوب وأسكت
وكتير جدا من يفاصلنى يكسبنى

====
أخى مقارب لهذه النوعية من مراد اللى بيحاول يكسب من غير ما يدفع كتير
=====
تحياتى لك شريف

Sherif said...

والقادم أجمل
===========
الحمدلله إن مش أنا لوحدى اللى ماعندوش الموهبة دى

يمكن لأن الواحد مش بيركز على الفلوس .. على أهميتها .. لكن الواحد بيقول شد حيلك انت والفلوس بتيجى ..

الحقيقة أننى أعيش ذلك
شرفتينى

المهاجر الى الله
============
شرفنى مرورك كثيرا وإن كنت أعتذر عن عرض وجهة نظرى ومفهومى للدنيا فبالتأكيد أنى اتمنى لك كل التوفيق والنجاح .. وقبلهما السعادة فى كل شئونك

فقط شككت فى أنى أستطيع تقديم شئ مفيد

أهلا بك دائما


الشاب الوسيم
============
ملاحظتى لهذه القدرات لاتعنى بأى حال انهم ليسوا على صواب .. بالعكس .. ربما كنا نحن الذين على خطأ

فلا غضاضة على الاطلاق فيما يفعلون

غيرش انها بعض حسد مننا لأننا لانستطيع أن نفعل مثلهم

يسعدنى حضورك دائما

Anonymous said...

السلام عليكم

الحقيقة اردت ان اقول كلمة واحدة :

تحياتى

و سامحنى ان كان تعليقى اول مرة بايخ شوية

https://www.blogger.com/comment.g?blogID=1662307914391471688&postID=3954017162989900866

بس انا مشفق على العقول المتميزة فى هذا البلد

قلت انك رجعت تانى

ايه اللى رجعك

امممممم

برده مفيش فايدة فى ردودى

تحياتى

مؤمن

Sherif said...

عزيزى مؤمن

تعتقد أنك تختار مصيرك ؟

هذه هى الخدعة الكبرى التى يقع فيها كل واحد ..

فمن الممكن ان تقرر السفر .. فلا تجد النقود .. واذا وجدت النقود .. قد لاتجد التذكرة والحجز .. وبعدما تصل الى هناك .. قد لاتجد الظروف كما تخيلت .. وهكذا

شيئان لايملكهما الإنسان .. الزمان .. والمكان

أهلا بك دائما

مياسي said...

شريف

هاي تالت مره يمكن ما تردش ع تعليقي
صدفه و لا إيه؟؟

أنا بلشت أشك !!!

Sherif said...

مياسى العزيزة

أولا أنا لااستطيع عدم الرد .. وانت تعرفينى جيدا

القصة ان هناك خلل حدث فى هذه المدونة أود بكل البوستات السابقة عدا الأخيرين .. إذ فجأة تحولت كل الحروف الى مربعات

صار لى يومين أحاول اختبار السيتينج بلا جدوى .. والى الآن

يمكنك اختبار ذلك بنفسك واختارى أى بوست قديم لى عدا الأخيرين ولن تجدى سوى صورة .. ومربعات مع ان ال
encoding is unicode (UTF-8)

أكاد أجن
أكرر اعتذارى مرة أخرى

مياسي said...

العزيز شريف
أنا كنت شاكه انو الموضوع من المدونه مش منك

بس حبيت أتأكد لأنو بعرفك الا ما ترد

كان الله في عونك؛ فاهمه شعورك مزبوط

Anonymous said...

السلام عليكم

" شيئان لايملكهما الإنسان .. الزمان .. والمكان "

فماذا تبقى اذا لنا كى نملكه

مؤمن

Sherif said...

عزيزى مؤمن

هل يمكنك أن تقول .. يوم الاثنين القادم سأكون فى طنطا دون أن تقول إن شاءالله؟

الآن عرفت من يملكهما

مرحبا بك