Tuesday, August 19, 2008

هو طابور اللياقة الساعة كام؟ -
ستة بالضبط -
ياه .. فاضل ساعة الاربع بس .. -
يعنى تلحق تعمل السنتر لاين بتاع اللوحة الخامسة ..
انت مشروعك كام لوحة؟ ..
سبع لوحات .. -
خلاص هانت .. -
مش هايعفونا من طوابير اللياقة دى ؟ -
انت بتحلم .. مش فاكر كلام المدير .. -
عمى فى عينكم Physical Fitness
آه .. أهم حاجة اللياقة ..0 -

كان ذلك الساعة الخامسة والربع صباحا بصالة الرسم .. والتى نمضى فيها الليل وقوفا لنرسم لوحات المشروع .. اللوحة الرئيسية .. واللوحات الملحقة بها
النظام عندنا ليس جماعياً .. بمعنى أن كل طالب له مشروع خاص به .. أما مسألة الوقوف فليست لقلة الكراسى لاسمح الله وانما لأنك لو جلست فلن تطول اصابعك آخر اللوحة .. هذا غير الأوضاع الغريبة التى يتخذها جسمك .. مرة منحنى .. وأخرى مع التواء بسيط الى اليسار .. وثالثة وانت تشب على أطراف أصابعك وهكذا
كل هذا مع كتم النفس لأطول فترة ممكنة حتى لايرتعش القلم بين أصابعك .. فاذا أردت التنفس .. عليك برفع القلم .. وأخذ نفس عميق واخراجه .. ثم العودة مرة أخرى الى آخر وضع اتخذته

واذا تأملت الوجوه فتلك قصة أخرى .. ترى شفاها ممطوطة على يسارك .. وقد تجمدت على ذلك الوضع .. وترى وجها متجهما عن يمينك من شدة الاحساس بالظلم والعذاب وقوفا .. أما أحسنهم حالا فهو من استخلص دقائق يرسم فيها جالسا على الكرسى

والسهرة عادة تبدأ بعد العشاء .. لأن الرسم يستغرق وقتا طويلا .. يمتد الى الصباح فى أحيان كثيرة
فى أول الليل يبدأ الكل بمنتهى النشاط والحيوية .. فتبدأ حالة انسجام واحد .. وهى حالة يبدأ كل واحد فيها فى الغناء منسجما مع مايعمل بصوت منخفض
بعد ساعتين تبدأ حالة انسجام اتنين .. وهذه حين يتحول الغناء الخفيض الى أنين على نحو ما
وبعد أربع ساعات .. تبدأ حالة انسجام تلاتة .. حين يبدو الجميع كالجالسين فى غرزة بلدى .. فتنتابهم نوبة ضحك .. بسبب أو بدون .. كمن يسرّى عن نفسه
وآخر مرحلة .. حين يبدأ كل واحد فى اصلاح كل أخطاء الرسم بالموسى والاستيكة .. فتسمع من يقول " كشط كحت .. فوق تحت" تناغما واستعدادا لطابور اللياقة الذى يأتى بعد قليل
كان ذلك فى فترة المشروع بالكلية .. نهاية السنة الرابعة .. وهى أقسى سنة مرت علينا من سنوات الكلية كلها

لماذا ؟
وحتى يتضح لماذا يكفى فقط أن تعرف كيف كان البرنامج اليومى
الاستيقاظ فى الساعة الخامسة صباحا .. نوبة صحيان .. تقوم فتغسل وجهك وترتدى ملابس الرياضة وتنطلق الى الملعب الكبير هذه لجميع طلبة الكلية عدا سنة خامسة لأنهم بهوات أصبحوا ضباطا تقريبا .. نحن فى صالات المشاريع بملابس الرياضة من أول الليل .. لأن الصالات بعيدة عن اماكن النوم وهكذا نقضى الليل فى الرسم فاذا أذن الديك ننطلق مباشرة الى الملعب ونحن جاهزون

طابور اللياقة يبدأ فى السادسة .. جرى حول الملعب اربعة عشرة مرة .. ثم تمارين القفز فى الهواء والضغط والقرفصاء وغيرها كل واحد ثلاثين مرة
ثم نعود للعنابر .. دش ساخن حتى فى الصيف .. نرتدى الأفرولات .. السابعة طابور الافطار .. عدس وحلاوة وشاى ولبن (حتى الأكل يتميز باللون الكاكى) .. الساعة الثامنة طابور ضباط نتوجه بعده الى المحاضرات والسكاشن
ينتهى اليوم الدراسى فى الثانية .. حيث الغداء .. وبعده نستعد للتدريب على طوابير العرض العسكرى بالسلاح لتخريج سنة خامسة .. هم بشوات يستعدون للتخرج ويتقمصون شخصيات الضباط من قبل التخرج .. فيتفننون فى اختيار أزيائهم وقبعاتهم .. ولايحضرون غير طوابير التخرج للتدريب على التحية بالسيوف .. ومراسم التسليم والتسلّم .. وهى تسليم مسئولية قيادة الكلية بالكامل الى سنة رابعة .. اللى هى احنا
بعد انتهاء الطابور .. ساعة راحة قبل السادسة حيث طابور المساء .. فالتوجه الى صالات المذاكرة أو المشاريع .. ثم العشاء فى العاشرة .. فى الحادية عشرة نوبة رجوع .. إيذانا بالنوم .. وهو نوم اجبارى بجميع الكليات العسكرية .. الا نحن والا أصبحت كلية لم ينجح منها أحد .. فتتوجه سنة رابعة الى صالات المشاريع فى الغالب بملابس الرياضة .. لأنك لن تجد وقت للعودة الى العنابر لترتديها كما ذكرنا .. وهكذا وقوفا الى الصباح

نعم .. هذا هو البرنامج بلا مبالغة .. وألمح فى عينيك سؤالا حائرا تريد أن تسأله .. اذا متى ننام ؟
!! .. سؤال وجيه .. وإجابته أوجه .. فى المحاضرات طبعا

تذكرت كل هذا لشئ هام جدا .. فنحن فى عصر ماقبل الاوتوكاد نرسم كل شئ بأيدينا .. ولم تكن هناك مكاتب رسم جاهزة ترسم لك المشروع بالكامل .. وبعد أن أنتهيت من مشروعى .. قبل مناقشته بيومين .. كنت أسير مع زملائى فى الردهة التى تفصل بين صالات الرسم والفصول .. وهذه بها مقاطع لمحركات معدنية حقيقية للسيارات والدبابات للتعليم
كل منا يلف لوحاته الكلك الشفافة بعناية .. ويضعها فى رول أحمر جميل طويل وتسير به كالسلاح بالضبط .. تحافظ عليه مثل حياتك .. فهو مستقبلك كله

نسير الهوينا .. ونهزَ به قليلا للأمام والخلف
ويبدو أننى كنت أهزّ الرول بحماس زائد حبتين .. وفجأة .. إذا باللوحات تنطلق من الرول تبعى كالصواريخ .. وتطير فى الهواء
!! .. لتستقر فى أحد الثقوب الواسعة للسلندرات المرصوصة .. يانهار مش فايت

لم أدر ماذا أفعل .. ومجهود شهور ينهار أمامى .. ومستحيل أن تعيد هذا العمل مرة أخرى .. بكيت من الإحباط .. حيث لايجدى البكاء .. وعبثا حاول زملائى تخفيف تلك الكارثة عنى .. وصرنا نفكر .. ولم نجد غير محاولة لصق ماتمزق وما تكرمش من اللوحات باستخدام السيلوتيب

خرجت اللوحة الرئيسية ملصّمة بالقدر الذى يمكن معه المناقشة .. مع تنزيل التقدير درجة واحدة .. المهندس يجب أن يحافظ على شغله .. فلا يمكن تسليم العميل لوحات تنفيذية ملصّقة

أخطأت فى شى واحد
!! .. عندما وضعت اللوحات فى الرول .. نسيت أن أضع غطاؤه .. وسرت به والفتحة لتحت .. فلم آراها


يانهار مش فايت ..

24 comments:

مياسي said...

تصدق اني انقهرت معك ع شغلك اللي خد شهور و بالأخير طار في الهوا

منيح اللي قبلوه و ما خلوك تعيده كمان مره

تحيه لصاحب الذكريات الجميله دائما :)

bastokka طهقانة said...

انا عجبني النظام ده قوي جدا خالص و حدخل الواد الطهقان الصغير فنية عسكرية علشان يتعلم السير يطلع منين


اوروفوار

راجى said...

فاكر السليدرولر؟
slide ruler?
ياترى يا شريف باشا حضرت اللواء فودة؟
هل تعرفت فى يوم من الايام على المهندس رأفت رشاد مسعد او اللواء المهندس حسين ابراهيم الذى وصل الى نائب رئيس الهيئة الهندسية؟
دول اعز اصدقائى واللواء فودة كان رئيسى فى شركة مصر الجديدة فى يوم من الايام رحمة الله عليه

واحد عاوز يفهم said...

ايه رايك انا بعت للقطة(قطة الصحراء) تعليق قولتلها فيه ان فيه مثليين ومثليات شواذ يعنى ليهم مدونات وبيعلنوا عن نفسهم وبيعلقوا عند القطة وانتى بتسمحى بنشر تعليقهم( قصدى القطه ) وسالت القطه اذا كانت بتسمح لدول يعملوا اللى عايزينه لانها حرية شخصية فمن باب اولى تسمحح للمنقبات او المحجبات يلبسوا اللى هما عاوزينه
طبعا القطة مارديتش ومنشرتش التعليق
ده معناه ان القطة بتجزا المبادىءاو انها هدفها النقاب وبس لحاجه فى نفسها والا ليه ما نشرتش التعليق او حتى ردت عليه

وكلامى كان كله منطقيه وما فيش فيه اى تجريح حتى انا قولتلها لو محرجة من نشر التعليق ردى عليه من غير ماتنشريه
لكن القطه ما عندهاش رد لانها لو اباحت لهؤلاء ما يفعلون فالاولى ان تبيح لغيرهم ايضا لكن يظهر ان القطه فاهمه الحرية لناس ولناس لا

insomniac said...

ayyyyyyyy

mahma 7awelt, mesh ha3raf atakhayal sho3oorak sa3etha!! ana akhry kan law neseet adoos save wel ta3deelat elly 3al paper matsageletsh, ba3od a3sor fe demaghy wafteker and sometimes i would end up doing the whole thing again, be it paper or presentation... bas no matter how hard it would be, it will always be much easier than drawing... yemken 3ashan ana wa7da mesh bete3raf tersem dawareyeteen zay ba3d!!

well, so2al, when you look back at such tragic moment, do u remember it with a smile???

karim said...

ان اللة لا يضيع اجر من احسن عملا, صدق اللة العظيم . لولا تعبك و مجهودك ماكنت تستطيع ان تصلحها و تمر من الموقف بسلام

Arabic ID said...

شريف الرائع
دائما أسلوبك ممتع
بصراحة لازم كنت هتنسى الغطاء بتاع الرول ، ما صدقت تخلص المشروع وطالع علشان تلحق الطابور مع قلة تركيز بسبب قلة النوم
يعنى معذور ، الحمد لله مجهودك ما ضعش

يا ترى غيرت رأيك فى بهوات سنة خامسة لما طلعت خامسة ولا فعلا بقيتوا بهوات؟؟؟

====
تحياتى لك

و القادم....أجمل said...

اي اي اي
ينهار

دي حاجة تقهر فعلا
:\

الحمدلله انها عدت على خير
و ربنا عمره ميضيع مجهود حج


تحياتي و تقديري لحضرتك
و لأسلوبك الرائع
:)

appy said...

ليه سؤال هو ليه البنات مش بيدخلو عسكريه انا عن نفسى نفسى هههههههه ادخل

سلوى said...

إنسجام واحد وانسجام اتنين
....

:)
أنا فعلا بشوف كل الأحداث أمامي

وأنا بقرأ
والله زكريات حضرتك شئ جميل فعلا

والحمد لله إن تعبك لم يذهب هباء
وعرفت تنقذ مشروعك

دمت بكل الخير والسلام
وكل سنه وحضرتك طيب أنت وكل الأسرة :)

canary said...

وطبعا يا اطفالنا الحلوين دة اللى بيحصل لكل واحد ميسمعش كلام مامته وباباه ويجتهد ويطلع لاعب كورة او مغنى كباريهات او رقاصه زى ما انتو شايفين كدة بيبقى مجرد عيل فالح ومجتهد ممكن يطلع مهندس ولو ربنا غضب عليه اوى يطلع ظابط مهندس ويفضل يا اولاد شغال طوابير ونظام ومن البيت للثكنه للمعسكر للعنبر ولا فيش نوم ولا راحه ولا حتى مستقبل لأنه اخرة بيطلع معاش على 40 سنه ويبدأ يدور على حياة تانيه يبتديها من اول وجديد لكن لو كان شد حيله وعرف يشوط اجوان او طلع اشطر وعرف يسرق قرض ويبقى ملياردير ويركب يخت وطيارة خاصه ويدبح مغنيات زى ما هو عايز على سبيل الاضحيه
صحيح . من جد وجد يا جدعان

قلب ينبض لله said...

يانهار أبيض علي الرسم

أنا كنت بسميه تعذيب الكفار
ماكنتش بحبه خاااااااااااااااااااالص
رغم ان هي سنه واحدة بس اللي رسمت فيها في الكليه وهي أعدادي
عد كدا مابئيتش برسم الحمد لله

الله يكون في عونك بجد دا أنت شوفت أيام سواد

Sherif said...

مياسى
=====
ربنا مايحكم عليكى ابدا
ربنا ستر


baskota
=======
اوعى تعملى الغلطة دى .. نصيحة اقرى تعليق كنارى قبل أى شئ

راجى باشا
=========
ربنا يكرم اللى عايش ويرحم من مات
دائما تفكرنى بناس جميلة

slide ruler?
مش البتاعة اللى تزقها من هنا تتزحلق من الجنب التانى؟ وعلى ماطروح تشوف النتيجة تكون اتزحزحت شوية ؟ يعنى كل الارقام غلط؟

بالذمة مش كان ده العصر البدائى للهندسة ده احنا كافحنا بجد

عزيزى واحد عاوز يفهم
====================
اولا قطة الصحراء حرة فى عرض أو حذف نايحلو لها فى مدونتها التى هى صالونها الخاص لها ولأفكارها وافكار من تحب التحاور معها

ثانيا أنا لست مفوضا فى التحدث بالنيابة عنها لأنها ببساطة لم تعطنى هذا الحق

ثالثا لماذا تحدثت الى بالذات وربما لاتعرف انى لااحب الخوض فى احاديث لاطائل من ورائها

رابعا وهذا هو الأهم .. أحب من يدخل عندى ان يعلن نفسه ويقول لى هو مين .. عادة لاأرد عمن لااعرفهم

insomniac
=========

I love your being here in my blog .. doing the whole thing again on a computer is probably simpler than manual .. with such deadly slow output ..

Anyway, yes such tragic memories I recall with a smile .. but I swear
I was then close to a heart attack

Karim
=====
والله ربنا برضه ستار حليم


الفتى الوسيم
==========
الحمد لله .. عايز الحق .. بقينا بهوات طبعا .. والله من قسوة السنين الخمسة واحنا فى طابور التخرج ماكنش مصدقين اننا اتخرجنا

والقادم أجمل
===========
الجميل انك من غير ماتقصدى دستى عالجيم بدل الدال

فعلا ربنا عمره مايضيع مجهود حاج

اسعدتينى بمرورك

Appy
====
ياه با آبى .. الرقة دى ماتليقش مع الطوابير والمارشات

على فكرة فيه ضابطات تعمل فى السكرتارية فقط .. اذا حبيتى

سلوى
====
حكاية انسجام واحد واتنين بتحصل لكل واحد لما يسهر بيشتغل

وانت بالف صحة وسلامة والاسرة الكريمة

canary
======
هههههه
مش ممكن العسل وخفة الدم دى

انا قريت تعليقك لكل فرد فى العائلة وحتى الضيوف اللى كانوا عندنا

كانوا هايطقوا من الضحك
سؤال برئ .. مين فى العيلة عندك ظابط عشان كده عارفة كل التفاصيل دى؟

قلب ينبض الى الله
==============
طبعا ده لحسن حظك .. هو فعلا تعذيب .. ولازم تنال عقابك بنفسك

انا عن نفسى كنت باعتبره تكفير عن الذنوب .. وهو شبيه بالجهاد فى سبيل الله

Desert cat said...

استاذ شريف وحضرتك بتحكى عن رسم لوح المشاريع رجعتنى لايام الله لا يرجعها تانى
اصلى كنت تقريبا باخد نفس الاوضاع دى انا كان عندى كل شهر لوحة وبحث للتقييم ويا اما او اما وانا وصحباتى كنا نسهر للصبح فى الصالة الكبيرة اللى نتجمع فيها فى المدينة الجامعية وكلنا تقريبا كانت الوشوش والتعبيرات المختلفة اللى حكيت عنها ... بس فيما بعد اصبح الاتوكاد بالنسبة لى مش مشكلة والحمد لله .. لأنى درست مبانى وميزانية وترافرس فده كله كان بيساعد مع بعضه والله لا يوريك ولا يورى السامعين قادر يا كريم ... بس اللى كرهنى فى الدنيا باللى فيها هى الوصفيه ومش انا اتخرجت وكنت بدرسها فى اول سنة كمان بس لحد النهارده لسه بكرهها وهفضل اكرهها لحد اخر يوم فى حياتى
الفرق بينى وبينك النظام اللى بتتكلم عنه فى التمرينات وما شابه الحمد لله مش كنت عسكرية
بس احد المقربين يحكى لى على التمرينات والعذاب اللى بيشوفوه من الفجر بس ربنا فكها عليه وفى العام الدراسى الجديد هيبقى زى الظبابيط اللى مش بيعملوا حاجه غير انهم يستعدوا لعرض السلاح
:)
فكرتنى بالذى مضى
تحياتى لحضرتك

واحد عاوز يفهم said...

استاذ شريف
شكرا لحضرتك على نشر التعليق
وانا اسف لو ضايقتك بيه
بس قطة الصحراء استفزتنى فقررت انشر التعليق عند اللى علقوا عندها يعنى مش قصدك انت بالتحديد
ولك الحرية فى ترك التعليقين او حذفهما
بل انت مشكور على سماحك بنشره

وفى النهاية ارجو من الله ان يوفقك ويحقق لك كل ما تتمناه وترجوه
ورمضان كريم

رحــــيـل said...

ده عذاب مش دراسه

لا بس عجبنى انا قوى

اذا متى ننام ؟
!! .. سؤال وجيه .. وإجابته أوجه .. فى المحاضرات طبعا

هههههههههه
اجابه منطقيه جدا

تحيات وتقديرى

canary said...

يعنى فضحتنى ومش بس عندك فى البيت لا ووزعتها على الضيوف كمان
وردا على سؤالك الغير برئ على الاطلاق
محدش فى العيله كان ظابط وانضف واغنى واحد فيهم ابويا واخرة كان عسكرى فى الجيش من ايام حرب القرم
التفاصيل عاديه ومعروفه كمجرد معلومات

Sherif said...

رحيل الرقبقة
============
والله يابنتى حاجات كتير الناس تشوفها تقول يابختهم .. ولو عرفوا عيشتهم تقول الله يكون فى عونهم

وهو احنا بس اللى كنا بنام فى المحاضرات؟ .. بيتهيألى دى طبيعة شعب

دائما تنورينى

canary
======
والله دى غلطتك ..
حد قال لك تبقى لذيذة ودمك خفيف؟

الشرف الحقيقى للى بيطلع ولاد جدعان عندهم قيم زى حضرتك .. مش مهم كان بيعمل ايه

ياما ناس مراكز .. واولادهم زى مانت عارفة

تنورينى دائما

اجندا حمرا said...

العزيز شريف

وحشني ذكرياتك الحلوه ياجميل
عامل ايه؟يارب تكون بخير

الواحد فعلا بعد اما بيعمل مجهود كبير ساعات ممكن ينسي تفاصيل صغيره تضيع كل المجهود اللي عملناه
بتمنالك دايما التوفيق في كل حاجه بتعملها صغيره و كبيره
تحياتي ليك

كاميليا said...

أنا جيت أسلم

وأطمئن عليك

كعادتك
تبحر بنا فى اعماق من الذكريات الجميلة
نعيشها معك .. ونراها بعيونك

دمت بكل الود

تحياتى

Sherif said...

اجندا المتدفقة
=============
حمد الله عالسلامة

جرس الفسحة طول قوى ..

عودة محمودة لقرائك

كاميليا
=======
مدونتك وبيتك

مرحبا بك فى كل وقت

ولاء said...

الألم العظيم يصنع شعب عظيم

في رأيي لولا المعاناه لما نجح العمل
بوست راائع فعلا ومعاناه متكررة يوميا ولاكنها صنعت تاريخ داخلي والتزام سارت عليه الحياة العملية لخصته في كلماتك الاخيرة من البوست
وضرورة الحفاظ علي المل وكل صغيرة وكبيرة فيه
تحياتي اخي

Sherif said...

ولاء
====

ماتقولينه هو الحقيقة

تنورينى بوجودك

maxbeta3zaman said...

ذكرتنى بالعبارة الشهيرة التى ما إن يتفوه بها مساعد الكليه حتى يصيح الكل فى زوم وهمهمة يغلب عليها الهم ...ييييه تلك كانت " طابور اللياقة فى ميعاده" .... وربما زادها بعد الزوومه بعبارة ...ياشوية نمر لزوم التأكيد على الويل الذى ينتظرنا مع الفجر ...أوتذكر قصيدتى فى عبده جبارة مايصلح منها للنشر بيتين فقط هما
آل إيه دخلتو الكليه .. شوفو ابو ليه... خلسه وتمويه
ودخلها هوا بمجهوده ...شوفو بروده..حقه مقويه
هذا للذكرى غير الخالده لطابور اللياقة الذى كان دائما فى ميعاده