Wednesday, November 5, 2008

فى الساعة الثامنة مساءا دق جرس التليفون فى بيتنا
باشمهندس شريف ممكن تشرفنا دلوقتى فى المكتب -
يادكتور .. دلوقتى صعب شوية .. -
فيه مانع ؟ -
الحقيقة أنا عندى السباك بيشتغل فى المطبخ والدنيا -
ملخبطة .. يمكن حضرتك سامع الدقّ والتكسير
طب ماتسيبه يشتغل وشرّفنا ساعة ولاحاجة .. -
السيد رئيس مجلس الادارة عايز يشوفك ..
المشكلة انى لوحدى فى الشقة .. ومش قادر -
اسيبه وانزل .. لو ممكن حضرتك آخد ميعاد تانى ؟
هاحاول .. بس بصراحة مش سهل آخد -
ميعاد تانى .. هو كان عاوز يشوفك دلوقتى ..
أنا آسف جدا .. مش عارف أعمل أيه .. -
عالعموم هابقى اتصل بيك لو فيه ميعاد تانى .. -

الموعد هو مقابلة شخصية فى الصراع المحموم للبحث عن وظيفة محترمة بعد عودتنا من استراليا .. والحقيقة اننى لم اكن وحدى بالمنزل .. كانت زوجتى موجودة .. وأذنها معى فى هذا الحديث .. وماكاد ينتهى حتى انهال على هذا الوابل
ايه الكلام الغريب ده ؟ -
فيه ايه ؟ -
مانزلتش ليه ؟ -
أنزل فين ؟ -
تروح تقابل الراجل .. -
هو كده ؟ فى أى وقت وأى مكان ؟ .. تعالى فى اى وقت .. -
روح فى اى وقت ..
أنت مجنون ؟ هى الناس دى ماوراهاش غيرك ؟ يمكن الراجل مشغول -
.. ماعندوش وقت تانى ..
والله لو عايزينى هايتصلوا تانى .. -
يا سلام .. الناس بتحفى عشان تلقى حاجة كويسة .. -
وانت تقول له السباك ؟ سباك ايه ما انا قاعدة أهو ..
ياستى أكيد هايتكلموا تانى .. -
ابقى قابلنى .. -
هو يعنى لو رحت خلاص خدت الوظيفة ؟ مايمكن ماعجبهمش .. -
يبقى عملنا اللى علينا .. الفرصة اللى بتيجى مش بترجع تانى .. -
الحاجات دى بتاعة ربنا .. خليها على الله .. -

لكنهم لم يتصلوا ولايحزنون .. وضاعت الوظيفة
كنت قاب قوسين أو أدنى لتقلد وظيفة رائعة فى تلك المدينة الجديدة .. وانتهت المنافسة الى اثنين .. أنا ومهندس آخر قوى هو الآخر فاز بالوظيفة

المدينة بعيدة صحيح .. لكن الوظيفة تستحق .. أنا نفسى لم أفهم لماذا كان هذا ردّى
هل هو لأنها كانت مفاجأة لم استعد لها نفسيا ؟ ربما .. لابد أن أعترف باننى أنزعج من المفاجآت .. لا .. ليس بالضبط .. فهناك الكثير من المواقف التى كنت فيها من أسرع الذين يقررون قرارا صائبا حين يلجم الموقف الكثيرين

حدث ذلك حينما اشتعل حريق بسبب الكهرباء فى معسكرى .. فصحت تلقائيا وأنا أهرول مع الجميع .. كله بالرمل .. كله بالرمل.. لانبهم الى خطورة الماء وقتها
حدث مرة أخرى حين تعثرت زوجتى وجرحت وكان على الذهاب بها الى المستشفى واستلزم ذلك جراحة بسيطة فى الوجه .. ثم فحص كسور فى مستشفى أخرى .. كل هذا يبدو عاديا .. يحدث فى كل يوم وأكثر منه .. لكن قبل سفرك للخارج بست ساعات .. وأن تنتهى من كل ذلك .. وتسافر فى الوقت المحدد ؟ فهذا يتطلب على الاقل اعصابا هادئة وسرعة

إذن لماذا ؟ هاتف غريب اعترانى وقتها بأن اؤجل هذه المقابلة وهكذا فعلت .. وضاعت تلك الفرصة .. غير اننى لست ممن يعتقدون فى أن الفرصة اذا ذهبت لاتعود .. ولكنى اقول .. بل يأتى ربما ماهو أحسن منها .. فالمولى يقول " كل يوم هو فى شأن" يعنى كل يوم فيه أمل جديد

بعدها عملت بوظيفة مماثلة فى شركة أخرى .. ولكن فى مدبنة قريبة .. وحمدت الله على ذلك
ولم تمض ثلاث شهور حتى فوجئنا بأن الشركة قد بيعت لمالك جديد .. وساورتنا شكوك كثيرة وقلق على وظائفنا .. فالمالك الجديد لايعجبه أحد بسهولة .. وهو يرمى للكمال والاناقة فى كل شئ حتى العمل
هكذا تمت الصفقة بين عشية وضحاها فى رحلة قصيرة بين القاهرة وجدة .. وكان علينا الانتظار لانغادر لأن صاحب الشركة الجديد يريد أن يتعرف علينا جميعا

ووصل بعد منتصف الليل .. وكان يمر معه المدير العام يقدم الناس اليه ويعرفه بهم .. وحين جاء دورى .. قال المدير
مهندس شريف .. مدير ادارة الجودة -
عارفه .. هو كان المفروض يبقى عندنا من فترة .. وآديه رجع لنا برضه -

عندى سباك ..

45 comments:

~*§¦§ Appy §¦§*~ said...

هههههههههه
حلوه كان المفروض يبقى عندنا من زمان
بس هو انا عن نفسى حصل ليه ده قبل كده وقولت لا مش فاضيه مع انى كنت محتاجه الشغل بس كانت خضه كده مش عارفه ليه بس عموما اتصلوا بيه تانى ورحت اللى له نصيب فى حاجه بيشوفها ودى ارزاق
بس طلب ممكن ممكن
ابت ليه السباك ده الله يخليك هههههههههه

بنت القمر said...

النصيب والارزاق هما الجواب
احيانا نفس السيناريو ده بيحصل عندي في البيت الفارق الوحيد اني بكون يمكن اكتر توترا من زوجتك ولو عندي موعد بكون صاحيه قبله بوقت طويل
ولو في فرصه بحاول علي قد ما اقدر ما تضيعيش
لكن سبحان الله ضاعت مني فرصه مواصله الدراسه في مكان محدد السنه دي بعد ان فوجئت ان موعد التقديم فات ب تلااااات اسابيع!!
كأني كنت مشسحورة او مخدرة في الوقت ده وارجع واقول نصيب
وخيرها في غيرها
تحياتي

Arabic ID said...

شريف الرائع

هو جه التوفيق اللى بيقولوا عليه .. والنصيب برضه.. واللى انت عملته ده مش كبر لكنه رد فعل لنوع المكالمة.. يعنى حسيت بالضغط اللى موجود فى صوت اللى بيكلمك فما حبيتش الضغط ده، وكان رد فعلك انك ممكن ما تلحقش وتروح على الفاضى مثلا

------
أما بالنسبة لموضوع انك كان المفروض تبقى عندهم من زمان فده بالنسبة لى يثبت نيتك الصافية لأن ربنا بيقف جنبك وييسر لك الخير
--------
تحياتى لك

اسامه عبدالعال said...

oops
فعلا كل واحد بياخد نصيبه بس صدفه غريبه
اتمنالك التوفيق

مياسي said...

نصيب فعلا

أنا مش من عادتي التسرع في قرارتي بس مرات كتير بتخذ قرارات مفاجأه جدا بتصدمني أنا شخصيا لما أراجع حالي فيها؛ خصوصا لما أكون مضغوطه و أنا بطبعي بحبش أتخذ قرارات كتير ؛ فاشله في هيك مسائل عالآخر:)

بس عمري ما ندمت على قرار اتخذته لأنو دايما الحياه بتأكد لي انو الخير كان مخبالي بعدين

بس أكتر شي عجبني: كان مفروض يبقى معانا من زمان:)

الظاهر انها كانت فتره صعبه عليك:)

يلا صباحو

فاتيما said...

صدفة غريبة
و جميلة
أنا زى حضرتك برضو
مبحبش المفاجأت و لو حلوة
و مقتنعة أن كل خطوة نصيب و مفيش حاجة كانت مقسموملى و بتروح لحد غيرى
يمكن تروح بس هترجعلى فى معادى
يمكن دا اللى مصبرنى حبتين على بعاد يوسف حاسة أن ربنا باعده عشان يمكن وجوده مع والده فيه خير و حكمة لا أعلمها ...عشان يخشن شوية ...عشان يشتقالى و يفتكرنى أكتر ...عشان يرجعلى أحسن زى سيدنا يوسف ما رجع لأبيه
معرفش
بس احيانا ناخد خطوة للوراء أو نستكين فى اماكننا عشان نتقدم لقدام
تحياتى لحضرتك من قلبى

karim said...

لا اعلم ربما اكون مخطىء و لكنى اعتقد ان معظم القرارت الاولى والتصرفات تكون هى الصحيحة و ندرك ذلك بعد فترة من اتخاذها, لكن مش كل مرة تسلم الجرة, وكلة على اللة

راجى said...

شريف باشا
الحديث الشريف يقول
ما اصابك لم يكن ليخطئك وما اخطأك لم يكن ليصيبك
فالحمد لله على كل حال

عدى النهار said...

أفضل وأصحّ القرارات اللي الواحد بيتخذها هى القرارات اللي بيكون داخلياً راضي عنها وليس لمجرد أنها القرارات الأفضل حسابياً

قوس قزح said...

سبحان الله فعلا على حكايةالرزق دى
انا بحسها اوى لما يحصل مثلا و يجى لى فلوس زيادة الاقى بعدها كذا باب مصاريف اتفتح و يفضل معايا نفس المبلغ الاساسى
او احتاج فلوس و فجاة الاقى جات فلوس تكفى تسديد الاحتياج ده
وقتها بحس ان الواحد زى ما يكون بيعمل دليفرى
بياخد رزق من حتة لحتة يعنى انا لو رزقى 10 و جالى 15 بكون غالبا متاكدة ان 5 دى لحد تانى
لان مفيش حد بياخد اكتر او اقل من رزقه و مش مهم مين اللى وAصله له

و اعتقد ان انت كان لك رزق عند الناس دى و كان لازم هتاخده بأى طريقة

انا حره said...

فعلا والله انا لسه مجربه الموضوع دا قريب

الحاجه اللى كنت هموت عليها وضاعت منى وبكيت على ضباعها كتير لما قربت منها وشوفتها لقيتنى مكونتش هبقى مبسوطه ابدا لو اخدتها

سبحان الله العظيم

وعسى ان تكرهو شيئا وهوا خير لكم

Desert cat said...

استاذى العزيز
بعض الامور تجعلنا ننفعل وفى وقت الانفعال نأخذ قرارات غير محسوبة فى بعض الاحيان تخطئ والبعض الآخر تصيب
بالنسبة لى انا شخصيا فى لحظة انفعال قررت وبدون اى خطوات محسوبة وبدن اى دراسة عمل مشروع الجميع حولى كانوا مستغربين جدا بل انهم جميعا بقدر الامكان حاولوا اثنائى عن هذا التهور من وجهة نظرهم حينها بحجة انى مش بتاعة شغل واخرى اعمر فى شغل شهر واسيبه واروح .. لكن الكلام ده كان بيزدنى اصرار وانا من جوايا مرعوبة وخايفة بس قولت الى ربنا عايزه هيكون فات سنين على الكلام ده واللى يقابلنى دلوقتى من الناس اللى كانت بتقولى انتى مش بتاعة شغل هما اول ناس بيشدوا بطموحى وازاى حققته
يعنى دائما فى كل الاحوال المستقبل اللى ربنا مقدره هو اللى بيكون
مودتى واحترامى

safaa galal said...

.
النصيب

واضح ان كل كلامك لا يرمى سوى فى اتجاة

واحد ... النصيب ...و... القدر

وعسى ان تكرهو شيئ وهو خير لكم وعسى

ان تحبو شيئ وهو شر لكم يا عمدة

mahasen saber said...

سبحان الله
فعلا الارازاق والاقدام توضع بأذن المولى عز وجل
يعنى برضه ليك رزق مع نفس الشركه بس مكنش ده الوقت اليى ربنا كاتبه ولما جه الوقت اتباعت الشركه ليهم عشان رزقك ربنا كاتبه معاهم
شئ عجيب فعلادنيا
.........
بس بالنسبه لمرات حضرتك ردها رد اى ست عاقله بصراحه اصل البيت والتزاماته والشغل وفرصه فى مصر شئ من الصعاب المريره
.....
مبروك الوظيفه ولو متأخره
وربنا يسعدلك ايامك ويبارك فيها

سمراء said...

انا موافقة تماما على فكرة التاجيل مش بسبب المفاجاة بس بعتقد ان الحدود من الافضل تكون من البداية لان بالتاكيد لكل واحد منا حياه شخصية على نفس درجة اهمية الشغل

اما عن الفرصة اللي بتروح وترجع تاني فاعتقد ان لكل شئ وقته المناسب الذي يحدث فيه
وحتي لو مرجعتش تبقي مش مناسبة خالص

سمراء

insomniac said...

i'm having a lucky streek lately in knowing how stories end!! i knew things would end that way...

everything happens for a reason, sa7 :)

كاميليا said...

أنا جيت أتونس بالدفا هنا
أقعد وأسمع
أستمتع وأتعلم

ربنا يحفظك يارب


كل الود

blackcairorose said...

ساعات بقول آه أو لأ من غير ما اعرف بالضبط ليه قلت كده، او على الاقل بكون حاسه ان سبب الاجابة مش هو السبب الحقيقى حتى من غير معرف ايه هو السبب الحقيقى، يمكن حاجة جوانا قوى مستخبية بتملى علينا احيانا التصرف منغير ما تطل براسها وتورينا شكلها..يمكن

همس الاحباب said...

سبحان الله
كل واحد بياخد نصيبه وما تدرى نفس ماذاتكسب غدا .
نعم الارزاق بيد الله
وكل واحد بياخد نصيبه

kochia said...

عجبتني اوي فكرة ان اللي بيروح ممكن يجي احسن منه
مش لازم نزعل ابدا علي قدر ربنا
اما لو احنا اللي اخدنا القرار بيكون من القدر برده

موضوع جميل
تحياتي

Jana said...

الاستخارة ليست دائما بصلاة ودعاء..

قد يسبقك لسانك الى قول لم تكن لتفكر فيه او تنطلق يدك بفعل لم لتكن لتفعله والعكس صحيح ... فقط لأن الله شاء فقدر وفعل ... وكانت الخيرة فى أمره ..وكأنك استخرت الله فى ثوان ..وفى ثوان ايضا كان السينس والشعور الداخلى أكثر راحة فى اخذ تلك القرار السريع والعجيب

Sherif said...

آبى الكميلة
=========
يؤسفنى يافندم أن هذا السباك الذى لم أرى مثله فى حياتى دقة ونظافة ..افتكره ربنا

وبعدين احييك على قوة ملاحظتك .. وهى محور القصة كلها حكاية الخضة دى ..


بنت القمر
=========
صحيح نصيب .. الغريب هو الرفض اللحظى للمفاجأة ..واللى ساعات بيحصل وكأنه لاارادى

الفتى الوسيم
===========
مايثير الدهشة انها لفت ولقيتنى مع نفس الراجل اللى انا اعتذرت له فى الأول
اشترانى بالشركة الجديدة

أسامة
=====
مش ده يقول ماحدش يعتل هم فى نصيبه ويسيبها على الله؟

مياسى
=====
الحمد لله ان الخير فى طريقك
بس انت مش معايا ان ساعات المفاجأة بتخلينا نتخذ قرارات غريبة

تيجة بعدها تقول انا اللى خلانى اعمل كده؟

فاتيما العزيزة
==============
ربنا يطيب خاطرك .. هو السؤال الازلى .. هلى هناك تصرفات بنعملها بغير ارادتنا؟

انا احيانا باحس انها بالرغم من ذلك .. فيها شئ من الرفض

karim
=====
هو الخوف من كده .. مش كل مرة تسلم الجرة

راجى باشا
=========
كلام سليم مائة فى المائة ..هذا ما حدث فعلا

عدى النهار
==========
هى بصراحة لم تكن قرارت كنت راضيا عنها وقتها .. بقدر ماهى احساس بانك كالطائر المحبوس الذى يرفض أن يمسك به أحد

قوس قزح
=======
ده أكيد ان رزق فى النهاية ولازم نشوفه .. ان لم تسعى اليه سوف يسهى اليك

المفاجأة يا عزيزتى هى التى يصدر عنها ردود كوميدية فى بعض الاحيان .. بعدها لاتفهم .. ليه حصل كده ؟ مع انك انت هو انت برضه

أنا حرة
=======
أول مرة تشرفينى .. ويارب على طول

فعلا يقول المولى

وعسى ان تكرهوا شيئا وهو خير لكم ، وعسى ان تحبوا شيئا وهو شر لكم ، والله يعلم وانتم تعلمون

desert cat
==========
من اجمل صفاتك الشخصية انك قوية الارادة

ربما هذا ما مكنك من تحقيق حلمك .. أنا شخصيا لااختلف كثيرا فى هذا .. وفى هذا الموقف بالذات استغربت نفسى كثيرا

الم يصادفك موقف ترغبين فى الانسحاب منه الآن .. بمعنى انك لست على استعداد نفسى للدخول فيه؟ ربما فى وقت لاحق؟

safaa
=====
صحيح .. لكن السؤال .. هل تجرى المصائر على ألستنا دون ارادة منا؟

اعتقد انه كذلك

mahasen
=======
سعيد جدا ان اجدك ضيفة عندى
هذا يزيدنى شرفا

وعين العقل هو تحليلك للموقف .. أنا بس يا محاسن ان كنت مذهول من ردى انا اللى حاولت ابرره بكل قوتى

تلك التبريرات التى لم تقنعنى انا شخصيا

سرنى مرورك

سمراء الرقيقة
============
هذه آراء الناس الواثقة التى تحب ان تضع لشخصياتها دائرة محددة ولاتحب اختراقها بدون استئذان لأياً كان
مع ان الظروف المحيطة قد تقتضى قرارا آخر

insomniac
=========
Now you know the secret ?
but you're very adept at weaving very intricate feelings into a fantastic texture .. with amazing ending too ..
yes inso, later on we understand the reason


كامى الجميلة
===========
يارب تكون احوالك بخير

اتمنى ان نحتفل بيكم ونهنيكم أما توصلوا بالسلامة ..

بيتك ومكانك

BCR
===
بالضبط .. ده اللى نفسى اقوله

هو احنا مسئولين مية فى المية عن اللى بنقوله؟

همس الاحباب
=========
العريز خالد
هو بس النصيب اللى منتظرك ساعات يدهشك

Kochia
======
ولو انى متأثر جدا من ساعة ذو الشوارب
الا ان زيارتك وتعليقك الجميل يسعدنى جدا

jana
====
الفنانة التى ترسم بالكلمات

أحيانا نساق يا سيدتى الى اقدرانا فى نملك حيال ذلك شيئا

ما يتفق مل كلامك

سمـــــــــــا said...

جميل اسلوبك اوى يا شريف وجميل سردك

وانا لو مكانك كنت هعتذر مش بس علشان السباك ولا انى هرتبك من المفاجئة ، ولكن لان البيزنس البروفيشونال لازم يكون فيه ترتيب مواعيدوخصوصا لو الانسان وصل لدرجة معينة من الخبرة والكفاءة

يعنى ABC بيزنس بيقول انهم يتصلوا قبلها يحددو معاك ميعاد مش يتصلو فى نفس اليوم يالا انزل كأنك لاجىء للفرصة بتاعتهم ( انت اتصرفت صح وانا بحييك ) لان لو انت اتصرفت بعكس كده كانو هيتخيلوا انك واقع على الوظيفة وساعتها فى لغة السوق سعرك هيقل


كمان الشغل والرزق من عند ربنا يعنى محدش عارف الخير فين


وفعلا سبحان الله الدنيا صغيرة يعنى شوف الدنيا لفت واتقابلتو تانى :))

بس اللى استغربته وفى نفس الوقت عجبنى ان رئيس مجلس الادارة لسة فاكرة !! فعلا مصادفة غريبة

اهم حاجة قولى اخبار السباكة ايه ؟؟

:))

تحياتى يا جميل

carol 2002 said...

انا كنت معديه بالصدفه
فسمعت إن عندكم سباك و كلام كتير كده

طيب ممكن لو سمحت حضرتك تليفون الاسطى السباك ؟
أصلى فيه ماسورة مايه ضربه عندنا
:D :D

دائما تمتعنا بما تدخره من ذكرايات و مواقف
فعلا , كل شىء نصيب
و إلى ربنا كاتبه لك هو إلى هايكون

كل التحيه و التقدير
:)

نعكشة said...

:D

]ا سبحاااااان الله

لأ ديه مكتوبالك مكتوبالك

بس كل شيء بأوان

لأ بجد غريبة

بس ساعات فية احاسيس كدة بتوجة الواحد مش عارف ليه

بسميها انا ترتيبات قدرية

يلا خير

مبروك عالشغلانة :D

سلام عليكم

Sherif said...

سما
===
لك حضور طاغى فى تعليقاتك .. وانا ادرك تماما ان هذا رأيك .. وهذه هى شخصيتك بالضبط

اتخيلك ارستقراطية لايعجبها شئ بسهولة ومعتزة بنفسها

الأمر يا عزيزتى هو سؤال محير .. هل كل ما نقول هو بارادتنا المطلقة؟ أشك

السباكة تمام يافندم واحنا فى الخدمة

Sherif said...

Carol
=====
والله يافندم للأسف .. للأسف
ربنا افتكره

بس فيه ناس تانية كويسة برضه .. وبعدين نفسى أسأل سؤال

هى ليه الناس كلها سابت الموضوع وراحت تسأل عالسباك؟

البلد كلها بتخر ؟

:))

Sherif said...

نعكوشة
======

نصيب .. يلف يلف ويجيلك .. بشكل مثير للدهشة

يسعدنى مرورك كثيرا

klmat said...

ازيك ياشريف . من تدويناتك بلاحظ انك
من الناس اللى بتدرس المواضيع بسرعه وبتاخذ قرارت صح وانت اشارت لمواقف حصل فيها كده لكن احيانامش كتير ودى بتحصل معايا تلاقينى اخذت قد يبدو انه خطأ او ضياع فرصه والوم نفسى واستغرب طب ليه قلت كده بعد شويه الاقى كأنه الهام من ربنا سبحانه وتعالى بمنع ضرر او كتابه خير افضل منه . بشعر ان احيانا بنكون مسيرين رغم ان القرار بأرادتنا
عارف لو كان السباك مش موجود كان حايبقى فى عذر تانى فى حاجات مش بيكون لها تفسير وقتها. البوست ده جميل اوى
وكلام زوجتك اى حد فى مكانها حايقولوا وربما قلته لنفسك حقيقى بشعر بسعاده لما بجى ازورك
ربنا دايما يلهمك ما فيه الخير

Sherif said...

klmat العزيزة
============
صحيح الى حد بعيد .. لكن يظل السؤال هو
هل نحن مساقون الى ماتحدده اقدارنا؟
ام انها الخضة؟ وارجاء القرار الى وقت نفكر فيه على مهل؟ لاادرى

رحــــيـل said...

هههههههههههههه

دنيا صغيره بجد
اللى ليه نصيب فى حاجه لازم هياخدها

اليقين بالله
والامل فى بكره

سمات الشخصيات الناجحه دايما

ربنا يكرمك يارب

خالص تحياتى وتقديرى واحترامى

Sherif said...

رحيل الرقيقة
============
وحشتينا جدا

واتمنى ان التقى بكم فى أقرب فرصة لاجتماع رابطى مدونين الدقهلية .. ياريت يكون جمعة او سبت

يارب تيجى على طول

رابطة هويتي اسلامية said...

ندعوكم للمشاركة معنا في رابطة " هويتي إسلامية "

شارك معنا لنهضة التدوين

كون معنا أول شبكة تواصل في عالم التدوين

كلنا نتفق في الغاية نختلف في الأسلوب

هيا.................. كن أول المشاركين

رابطة هويتي إسلامية

Sherif said...

رابطة هويتى اسلامية
=================
أشكر لكم هذه الدعوة الكريمة

أميل للمساهمة فى شئ انسانى ليست على اى اساس دينى

فلو قلت هويتى اسلامية .. فما بال الآخرين؟

مياسي said...

أنا معك فعلا؛ و عملتها قبل هيك و رفضت أشياء لأني كنت متفاجأه فيها و مش مستعده نفسيا؛ فعلا أول شي خطر ببالي: لو محله عملت نفس الشي؛ وخلي الشغل يروح في ستين داهيه!!!

ملاحظه: كل الناس بتسأل عن السباك ليه فعلا؟

Gannah said...

انا ايضا ممن يكرهون المفاجأة ولكن كما قلت هى ليست الفاجأة بقدر ما هو شىء داخلى يفرض عليك قول ما فى وقت ما دون ان تدرى لماذا؟؟؟
تحدث لى أحيانا ولا أظنها الا اختيارات لا نملكها وغالبا ما تكون تحمل فى طياتها مفاجأة حقيقية كما حدث معك
رزقك يسعى اليك باكثر مما تسعى اليه
فى الغربة قصص تكاد تكون خيالية ولكن الواقع كثيرا ما يكون اغرب من الخيال
تحياتى لك ولاسلوبك السلس الهادف

Sherif said...

ساعات الواحد بيبقى محتاج .. ومش فاهم ليه قال كده

اعتقد مياسى فعلا انها المفاجأة .. اكتر منه قرار سليم

من الواضح ان الحنفيات كلها بتخر مية

مرحبا

Sherif said...

ganna
=====
صحيح .. رزقك يسعى اليك كما تسعى اليه

وزى ماقال راجى .. واعلم ان ما اصابك لم يكن ليخطئك .. وما أخطأك لم يكن ليصيبك

صدق رسول الله

Hadota .. حـدوتة said...

سبحانك ياربي
والله انا مقتنعة بالكلام دا جدا
كل واحد ليه رزق معين فى ساعة معينة مهما حصل هياخده


ودا اللى بيخلينى واثقة جدا ان ربنا مش ناسينى .. وان فيه خير انا معرفهوش حتى لو مش شايفاه دلوقتي


الله عليك
بجد مدونتك دافية جدا


تحياتى ليك

someone in life said...

شريف
كل شئ نصيب و في الاخر اشتغلت مع نفس الشركة لكن من باب اخر
انت فعلا انسان جميل و تستحق كل خير

تحياتي

Blank-Socrate said...

عزيزى شريف
انا متواجد فى كل تدويناتك
لا اجد ما قد اعلق به
فقط استمتع بطريقتك المشوقه البسيطه فى السرد

Sherif said...

حدوتة
=====

هذه المدونة افتقدتك كثيرا .. الدفء الحقيقى هو كل الاصدقاء الذين يجعلون للمكان بهجة وحيوية

وانت بالتأكيد من أوائل من جعل هذه المدونة تستمر

عودا حميدا ..

وعفوا سيدتى .. انتهى رصيدكم من الغياب .. نرجو حضوركم كثيرا

Sherif said...

Blank Socrate
=============
المدونة بيتك ومطرحك .. أهلا بك فى كل وقت

ان وجدت رغبة فى التعليق فمرحبا .. وان لم تجد فلا عليك .. الى مرة قادمة

قلب ينبض لله said...

هههههههههههههههههههههه

سبحان الله
دا الواحد بعد كلامك دا يسلمها لربنا من غير تفكير
اللي له نصيب في حاجة هاتجيله لو حتي أيه

Sherif said...

قلب ينبض لله
==========
حقيقى يا قلب

حبيت بس ارد ارد على مقولة عطلتنا كثيرا

الفرصة اللى بتيجى مابترجعش

مرحبا بك