Sunday, December 21, 2008

ايه يادندن لسه مانمتيش ؟ -
لا يابابا .. بس لازم أنام بسرعة دلوقتى .. -
بسرعة ليه ؟ -
الواجب خد وقت طويل جدا .. ومدام مشيرة -
عاوزاه بكرة
وخلصتيه .. -
آه .. بس أتأخرت قوى .. ولازم أنام قبل الساعة -
اتناشر
عشان تستريحى كفاية .. أكيد مدام مشيرة -
قالت لك كده
لأ .. مش كده .. -
أمال ايه ؟ -
عشان اليوجا -
ايه اليوجا دى ؟ -
دى الروح الشريرة .. بتيجى للاطفال اللى مش بيناموا قبل الساعة اتناشر -
مين قال لك كده ؟ -
أميرة صاحبتى .. -
وهى مين اللى قال لها كده ؟ -
كل اصحابى فى الفصل بيقولوا كده .. -
طيب حبيبتى .. نامى دلوقت .. لسه بدرى عالساعة اتناشر .. تصبحى على خير -
وانت من اهله -

ونامت دندن .. بل وغطت وجهها .. ربما كى لاترى هذه اليوجا اذا حدث وجاءت فعلا
علمت بعد ذلك أن أسمها الويجا .. وهى لعبة من ألعاب تحضير الأرواح السفلية التى تتنبأ بالمستقبل .. لكن هذه تختلف تماما عما يروجه الأطفال فى الصف الثالث الابتدائى بليسيه المعادى .. واندهشت كيف أن المدرسات لم ينتبهن الى ما يتداوله الاطفال ويذهب بهم خيالهم اليه
غير أن المدرسة كان من أجمل مافيها روح الصداقة التى يتآلف بها المدرسون والتلاميذ بحيث يبدو كل شئ شفافا فلا يخفى شئ عن أعينهم مهما بدا غريبا

كان أمامى حل من أثنين .. إما ان اتحدث الى أحدى المدرسات بالمدرسة واترك لها معالجة هذا الأمر .. فقط لازالة الرعب الذى يسكن عقول هؤلاء الصغار ويتسبب فى عدة أشياء
الأول .. أن الواجبات المكلفون بها طويلة جدا وتقتضى أن يتأخر الأولد فى نومهم .. ومع هذه الويجا التى ظهرت لهم فجأة فإن الواجب سيتم كروتته بالتأكيد قبل أن تدق الساعة الثانية عشرة
ثانيا .. الأرق و القلق من ترقب شئ مخيف .. فإن تغلبت على الأرق سيطاردك فى أحلامك
ثالثا .. تلك العقدة من شئ فى سن صغيرة والذى يستدعى وقتا طويلا حتى تنضبط الأمور فى عقولهم

والحل الثانى أن أتناول هذا الأمر بنفسى
أقول الحق .. ملت للثانى .. لأننى أعتبرت البناء الوجدانى لاولادى هو مسئوليتى المباشرة .. وهو مشروع مستمر ينبغى فيه أن نزيل كل التخاريف أولا بأول حتى يستقيم صحيحا لايشوبه شئ
تماما كما كانوا يعلمونهم أن الصيام الهدف منه هو الشعور بجوع الفقير .. وكنت أقول لهم هذا خطأ .. لأنه لو كان صحيحا لأعفى الله الفقراء من الصوم .. انما ذلك لأنه تكليف من الله .. وعلينا طاعته

فى اليوم التالى اتفقنا أنا ودندن – مع الرعب الشديد الذى انتابها مع هذا الاتفاق - أن ننتظر الويجا معا .. حتى الساعة اتناشر .. فاذا ظهرت فاننا سنعطيها حتة علقة حتى لاتجئ الينا مرة ثانية
وأعددنا كل الاسلحة الممكنة .. عصا وحبل حتى نربطها وحزام قديم أيضا
وعند الثانية عشرة بالضبط .. حاولت دندن أن تخفى نفسها تحت الغطاء .. سحبته برفق وأنا أقول
بابا معاكى أهو .. خايفة ليه -
أنام أحسن -
لأ .. هانستناها وبعدين ننام .. ( ثم مخاطبا الحائط ) ياللا ياست ويجا .. -
اتفضلى تعالى ورينا انت فين .. طبعا خايفة تيجى .. لأنك مش موجودة
.. لو كنت موجودة تعالى .. احنا مش خايفين منك
هاتيجى يابابا .. -
مش ممكن .. -
ليه ؟ -
لأنها مش موجودة .. مافيش حاجة اسمها ويجا .. وأميرة ضحكت عليكى ..شفتى -
.. اهى الساعة عدت اتناشر .. فين هى بقى .. وكمان هانقعد خمس دقايق ..برضه ماجاتش ..
ايه رأيك ؟
هى فين الويجا ؟ .. مافيش ويجا .. -
خلاص بكرة فى المدرسة قولى لأميرة أن قعدت مع بابا لحد الساعة اتناشر .. ومالقيناش ويجا -
.. وقولى لياسمين وكارولين وأسماء .. خلاص ؟
أيوه يابابا .. هاقولهم عشان مايخافوش .. -
تصبح على خير ياجميل .. -
ضحكت وقالت ..
وانت من اهله يابابا -

الويجا

36 comments:

klmat said...

انت فعلا اب ومربى جميل اوى ان نقنع اولادنا بطريقه عمليه
دى افضل وسيله مها كانت المدرسه حاتشرح او توعظ التجربه العمليه هى اللى بتعلم
جميل اوى البوست ده علشان الاباء والامهات اللى حايقرأو يستفيدوا منه
انت اب وقائد يحتذى به
دمت بخير

Arabic ID said...

شريف الرائع
---------

بس لو كانت طلعت كنت هتعمل ايه؟؟؟

صفـــــــاء said...

.
لا دة كان زمان
دلوقتى العيال مبتخفش حتى من ابو رجل مسلوخه ولو طلعته ليهم هيلعبو معاة او حتى هيلعبو بيه
وبعدين الويجا دى تحضير أرواح
انت كنت مودى البت فين؟
مدرسه أشباح ؟
انا بقى امى كانت أجدع
وكانت بتقولى اللى هتطلعى ليه انت اللى هتعفرتيه
.

someone in life said...

مرحبا
اشتقت لحكايات الاولاد فكرتني بابني و هو صغير كنا ماشيين في تركيا و شاف راجل عجوز واقع علي الرصيف و بيترعش من البرد و ما فيش حد بيساعده هو شافه و خاف و حط في دماغه ان كل واحد عجوز مرعب و خاصه لو عندة تجاعيد كل ليله ييجي ينام و يمسك فيا و يقول لي عم عجوز جاي بالليل و يحطني في شراب اسود طويل منين الافكار دي مش عارفه و كملت بزلزال كبير هناك و شاف الدولاب بيتحرك بشده بعد الزلزال كل ما يعدي جنب الدولاب يقول عم عجوز جوا الدولاب فضلت في حكايه عم عجوز دي لغايه كي جي تو تقريبا السؤال الاصعب بقي ماما هو انت لما تكبري وشك هايبقي فيه خطوط زي عن عجوز ؟ ارد اقول ايه ؟
دلوقتي طبعا العفريت هو اللي يخاف منه
تحياتي

سمراء said...

صياغة جيدة لدور الأبوين
تصرف تربوي وتعليمي عظيم

وفعلا لكل عصر اذان
لن يقتنع أطفال اليوم بأي غيبيات

بكي ابن صديقتي وقال لها انه خائف من ان ينام بمفرده علشان العفريت
فقالت له بشكل عفوي العفريت مش في اوضتك العفريت في الاوضة الثانية

فاجاب مندهشا هو فين ده ممكن اروح انام جنبة لحسن يخاف ينام لوحده

انت من اجمل الاباء

سمراء

Shimaa Gamal said...

What are fathers for :))

ربنا يخليك ليهم

مياسي said...

جميل جدا:)

يعطيك العافيه عهالتربايه

بس جد هلأ ولا عفريت و لا أبو كيس و لا أبو رجل مسلوخه و لا شي نافع!!!

Desert cat said...

جميلة جدا طريقة حضرتك فى معالجة الأمور المختلفة
هنيئاً لدندن بمربى بروعة وخبرة حضرتك ربنا يخليك ليهم يا فندم ويبارك لهم فى حضرتك

kochia said...

طيب دي حلوة حكاية الويجا عشان العيال تنام بدري
.
.
.
بهزر طبعا ...وعجبتني اوي طريقة اقناعك ليها .. واعتقد انك زرعت فيها بذرة شجاعة جميلة هتفضل معاها وتكبر طول العمر

تحياتي

karim said...

ما اجمل المواقف مع الابناء لانها غالبا ما تكون بريئة ونقية لانهم اطفال فى المنتهى البراءة, ولكنى اعتقد ان الاجيال الحالية متغيرة تماما

Sherif said...

klmat
-----
ربنا يخليكى .. ماأظن الا انك أيضا أم راجحة العقل .. وهنيئا لاولادك بك

Sherif said...

Arabic id
---------
الفتى الوسيم

لك وحشة طبعا .. ومش عايز اتكلم لان مقدر مشاغلك

فكرك كنت هاعمل ايه يعنى ؟.. هاسورق

Sherif said...

صفاء
-----
لو طلع لك العفريت هاتعرفتيه .. اصدق

كل ماباروح عندك .. بيتأكد لى اللى بتقوليه .. وباشوف قرائك واللى بيجرى لهم

يسعدنى تعليقك دائما

Sherif said...

someone in life
---------------
لايمكن تبقى زى عم عجوز ابدا

لان اجمل ميك آب ممكن بنت تحطه هو ابتسامتها

Sherif said...

سمراء
-----
أنا لاأباريك رقة فى كلماتك ومجاملتك

وشكرى لاطرائك لا يكفى

Sherif said...

Dear Shimaa
-----------

It's been long ..

I'm glad you see me a good father ..

Sherif said...

مياسى
-----
عندك ألف حق

كان زمان ممكن تضحكى عالصغار .. بعد النت والموبايل .. صاروا هم يضحكون عليك

Sherif said...

قطة الصحراء
-----------

قطة .. الاحظ ان تعاملك الرسمى لى يزداد يوما بعد يوم .. مع انى لست وزيرا ولا حتى ذا حيثية

وشخصى المتواضع لايحتمل كل هذا التأبيه

ممكن ..من فضلك .. تخلى البساط أحمدى وتنادينى باسمى .. فهو مااحب ان ينادينى به الجميع .. ويجعلهم أقرب لقلبى

Sherif said...

kochia
------
ماكانش قدامى حل .. وانت لازم تمشى باستيكة اول باول عالحاجات دى احسن تعمل لهم عقدة

فكرك حد بيخاف دلوقتى؟

Sherif said...

karim
-----
كلامك مضبوط .. الدور عليك يابطل مع الاجيال الجديدة اللى مابتخافش من حاجة

dreem said...

هههههههههههههه
الويجا
افتكر على ايامنا يا شريف كان فيه امنا الغولة وام رجلة مسلوخة
حتى الحكاوى اتغيرت
بس ربنا يخليكم لبعض يا شريف عجبتنى معالجتك لخوف بنوتك
ربنا يمتعك بيها
دمتم بخير

Sherif said...

dreem
------
هم يضحك وهم يبكى
لسه جاى من عندك .. وقريت بوست رائع

حضورك يملأ المدونة بهجة

انا حره said...

ياسيدى والله كانت فكره حلوه

لو حد تانى كان ماصدق عشان ينيم العيال ههههههههههههه

ربنا يخليهالك

Sherif said...

انا حرة
-------
تنورينى من الجين للحين .. ولو بزيارات قليلة

قوس قزح said...

الواحد لو بس فكر هيلاقى الحل لمشاكل كتير ابسط مما يتخيل

اختيار موفق لحل مشكلة كان ممكن تعمل ازمة نفسية

تحياتى

Sherif said...

قوس قزح
-------

تغيبين كثيرا

وحين تعودين .. تضيئى هذا المكان بتعليقك

دمت لى

كاميليا said...

السلام عليكم

طريقتك فى تناول الأمور وحل ما يعترضك
تشدنى بشكل مدهش
وللحق ..
أتعلم منها واختزنها .. لأنى حتما سوف احتاجها
ووقتها سوف ادعو لك بكل الخير

تعرف؟
حضرتك ذكرت جملة كده فى الكلام

((
تماما كما كانوا يعلمونهم أن الصيام الهدف منه هو الشعور بجوع الفقير وكنت أقول لهم هذا خطأ .. لأنه لو كان صحيحا لأعفى الله الفقراء من الصوم .. انما ذلك لأنه تكليف من الله .. وعلينا طاعته))

أتدرى كم من الأقوال الغير صحيحة تتعلق بالاذهان منذ الصغر
وعندما نكبر .. نخاف أن نسأل .. خوفا من تعدى الحدود

أنا أكيدة .. أنه لازال هناك من يعتقد الى الان
ان الصوم من اهدافه الشعور بجوع الفقير


عامك سعيد
عليك وعلى اسرتك الجميلة
وكل احبابك

كل الود

Sherif said...

كامى
-----

مرورك هنا يضيف كلمة رقيقة لا يكتبها غيرك

كل عام وانت لأحلامك أقرب

جعل الله أيامك كلها أعيادا

بنت القمر said...

عزيزي شريف
===========
مش ها تصدق توارد الصدف مع ما اعيشه اليومين دول ومع تدوينتك
بنتي الصغيرة"9"سنين عندها هوس وخوف هيستيري من ساعة حادثه بنت ليلي غفران وحاسة ان في سفاح ها يدخل يموتنا
وغلبت اقنعها انه مفيش حاجه ولا حد يخوف
لكن مفيش فايده وتفضل في حضني خايفة تنام وعياط لو سبتها ولو حست في نص الليل اني قمت ترجع تعيط تاني
واتكلمت معاها بالاقناع
ان البواب بيقفل باب العمارة بالليل وانه مفيش حرامية بيدخلوا عندنا
تقولي يمكن يدخل من باب الشغالين
لاني اسكن في عمارة قديمه من ايام ما كان في سلالم شغالين
او ها يمشي علي الماسورة ويطلع لنا
فعلا الاطفال والدخولي الي عالمهم والتعامل معاهم صعب اوي
تحياتي ليك وربنا يخليهم لك

Sherif said...

عزيزتى بنت القمر
----------------

قضية حقيقية يا قمر .. بس ماتسأليش عندك حل

أنا عانيت كتير حقيقى .. وشايف انه لو حد قدها قلبه جامد ومش بيخاف نام معاها يوم ولا اتنين .. بنت خالتها أو عمتها .. الموضوع ده هايكون مفيد جدا
وهاتشجعها تنام مرتاحة

تحياتى اليك .. وهل هلالك شهر مبارك
لك غيبة

كل عام وانت بالف صحة وسعادة .. ربنا يخلى البنات

fashkool said...

والله انت عالجت موضوع الويجا دا علاج صح برافو عليك .. هم العيال بيحطوا فى دماغ بعض حاجات ويطلعوا العفريت لبعض وما يعرفوش يصرفوه .. لكن برافو عليك .. تقبل تحياتى ومرورى

Sherif said...

fashkool
--------
خالص تقديرى وامتنانى لمرور حضرتك

وأرجو أن تكون اعجبتك تلك المدونة المتواضعة .. كما يسعدنى أيض أن أزور مدونتك باذن الله

شكرى وتقديرى العميق

Only Love said...

When I was young they used to tell me if you didn't eat all your food, Omna el ghola will come at night and eat you.
tab3an for me kan kefaya 3laya esmha el 7elw dah, so I had to finish all my food even if I don't like it at all.
you reminded me now with my sweetest days ever with this post :)

rbna yekhalek lehom 3la tol ya rab ISA :)

Sherif said...

only Love
---------

You're most welcome

سلوى said...

رائع

بهدوء وعقل :))

بس لو كانت طلعت بقي؟؟

أديكم كنتوا عاميلين حسابكم

بجد ما شاء الله عليك

Sherif said...

سلوى
-----

المهم ربنا ستر وماطلعتش .. أنا اللى كان شكلى هايبقى وحش